Banka Botërore: Kosova të krijojë mjedis të favorshëm për sektorin privat dhe vende pune me cilësi të lartë

Kosova duhet të përmirësojë produktivitetin, të adresojë pengesat në infrastrukturë, të krijojë një mjedis që është më i favorshëm për sektorin privat dhe të investojë në njerëzit e vet.

Kështu thuhet në mesazhin e Bankës Botërore pas takimit të zëvendëspresidentes Anna Bjerde me kryeministrin e Kosovës, Albin Kurti dhe përfaqësues të tjerë qeveritar, duke shtuar se Kosova duhet të krijojë vende pune me cilësi të lartë.

“Që Kosova të ketë vazhdimisht rritje ekonomike të fortë, të qëndrueshme dhe që krijon vende pune me cilësi të lartë, vendi duhet të përmirësojë produktivitetin, të adresojë pengesat në infrastrukturë, të krijojë një mjedis që është më i favorshëm për sektorin privat dhe të investojë në njerëzit e vet”, tha Bjerde.

Ajo gjithashtu ka diskutuar sfidat socio-ekonomike me një grup të organizatave të shoqërisë civile të Kosovës.

“Me presionet e vazhdueshme të inflacionit, ndikimin e luftës në Ukrainë në ekonomitë anembanë botës dhe masat fiskale të varfëruara ndaj pandemisë COVID-19, përvoja botërore tregon qartë rëndësinë e politikave të mbrojtjes sociale të synuara mirë dhe fiskalisht të qëndrueshme për të mbrojtur më të varfrit dhe më të cenuarit”, ka theksuar ajo.

Gjatë qëndrimit të saj në Kosovë, Bjerde ka vizituar ish-minierat e Korporatës Energjetike të Kosovës për të mësuar për sfidat mjedisore të Kosovës, po ashtu ka vizituar edhe Spitalin Rajonal në Mitrovicën e Jugut.

Banka thotë se ka filluar procesin e përgatitjes së Kornizës së re të Partneritetit me Vendin (CPF) për Kosovën për periudhën 2023-2027, e cila do të parashtrojë objektivat kryesore zhvillimore që do të mbështeten.

Në maj 2022, portofoli aktiv i huadhënies së Bankës Botërore arriti 379.55 milionë dollarë amerikanë, në 11 projekte në fushat e energjisë, bujqësisë, ujit, shëndetësisë, konkurrueshmërisë, financave, teknologjisë së informacionit dhe komunikimit, ndihmës sociale dhe reformës së kadastrës.

Prej vitit 1999, BB-ja ka siguruar dhe/ose ka menaxhuar mbi 500 milionë dollarë në Kosovë përmes rreth 40 operacioneve, duke përfshirë fondet e mirëbesimit. /Telegrafi/