Banka Botërore: Deri 60 milionë njerëz mund të përballen me ‘varfëri ekstreme’ si pasojë e pandemisë së COVID-19

Deri në 60 milionë persona do të përballen me “varfëri ekstreme” si pasojë e Coronavirusit, ka paralajmëruar presidenti i Bankës Botërore, David Malpass.

Ai ka thënë se banka pret që rritja ekonomike të tkurret për 5 për qind këtë vit, derisa kombet përballen me pandeminë.

Kjo situatë e krijuar pas pandemisë, ka ndikuar në humbjen e miliona vendeve të punës dhe dëmtimin e bizneseve, sidomos në vendet më të varfra.

“Miliona burime për jetesë janë shkatërruar dhe sistemet e kujdesit shëndetësor janë në tension në gjithë botën. Vlerësimi ynë është që deri në 60 milionë persona do të shtyhen drejt varfërisë ekstreme – që shkatërron përparimin e bërë në zhdukjen e varfërisë në tre vjetët e fundit”, ka paralajmëruar ai.

Banka Botërore e përcakton “varfërinë ekstreme” kur një person jeton me më pak se 1.90 dollarë në ditë.

Ky institucion me bazë në Uashington është duke ofruar grante dhe kredi me interes të ulët në vlerë të 160 miliardë dollarëve, për t’iu ndihmuar vendeve të varfra në luftimin e krizës.

Malpass ka thënë se 100 shtete, që janë shtëpi për 70 për qind të popullsisë në botë, tani kanë siguruar financa emergjente.

Me Coronavirusin e ri janë infektuar mbi 4 milionë persona në gjithë botën, derisa mbi 320 mijë prej tyre kanë vdekur. /REL/