Lajme Kosovë

Babai i Astrit Deharit e quan si “vrasje të dytë”, mosdhënien e raportit të ekspertizës nga Instituti Zviceran

Para 5 vitesh

Pas pranimit të raportit përfundimtar të ekspertizës për vdekjen e Astrit Deharit, i cili është kryer në Zvicër nga Prokuroria Themelore në Prizren, prindërit e të ndjerit kanë bërë kërkesë që t’u dorëzohet ky raport.

Në një konferencë për media, avokati i familjes Dehari, Tomë Gashi ka thënë se kërkesat e tij kanë pasur konotacion politik sepse sipas tij ai është vrarë për shkak që ka qenë aktivist i zellshëm.

“Ne kemi pasur kërkesa të vazhdueshme që ta marrim raportin zviceran të Institutit të Mjekësisë Ligjore, edhe pse në formë të shkruar kemi qenë të njoftuar se ky raport është kryer qe dy javë, përfundimisht dje na e kanë bërë me dije që e kanë marr. Çdo shkrese që kam bërë dhe çdo deklaratë timen ka qenë pjesërisht politike sepse kam qenë i bindur se çdo plagë e tij ka qenë vet-mbrojtëse. Kjo është dëshmuar se ai ka qenë i vrarë, dhe arsyeja pse është vrarë ka qenë politike sepse ka qenë në VV, për këtë arsye deklaratat e mija janë edhe politike. Ai ka qenë aktivist i zellshëm i Vetëvendosjes, dhe ka përkrahur gjithmonë çështjet kombëtare. Janë gjetur edhe dokumente të tij ku ka parashikuar edhe ardhjen e LVV-së në pushtet pikërisht tani. Një djalë si ai me vullnet të mirë e të gjitha gjërat e duhura, nuk ka mundur të bëjë vetëvrasje”, ka thënë ai, përcjell Telegrafi.

Babai i Astritit, Avni Dehari, në këtë konferencë ka treguar se si i kanë endur nga Prizreni në Prishtinë për të kërkuar një kopje të raportit.

“Me të marr lajmin se raporti ka përfunduar jam sugjeruar prej ekspertes Syzanës që t’i drejtohem personit kontaktues për raportin, këshilltares së kryeprokurorit, zonjës Merita Gashi. Në telefon e mora zonjën Gashi dhe i thash të më lidhë me kryeprokurorin. Ajo në mënyrë arrogante më tha nuk e kam numrin, pastaj u arsyetua se gjëja është zëvendëse e administratorit, por nuk arsyetohet. Pas një kohe brenda ditës Merita Gashi më shkruan një email dhe më thotë drejtohu tek kryeprokurori i Prizrenit zotëri Shala. I dërgova menjëherë email, kërkova ta caktojë një termin, duke ia lënë numrin e telefonit, adresën e emailit, me qëllim që të ma caktojnë një termin që të shkojmë ta marrim një raport origjinal. Kurrfarë përgjigje nuk më ktheu. Sot ishim atje, na pranuan brenda dhe ia filloi të na mbajë ligjëratë se gjoja mediat dhe avokati po e politizojnë rastin, se çdo gjë është në rregull tek ata. Unë kërkova që të na jap një raport origjinal më tha se nuk e kemi”, ka thënë ai duke theksuar se ata që e kanë vrarë Astritin ia lënë fajin njëri tjetrit.

“Njerëzit që kanë faj, që i kanë duar e përlyera, njerëzit që e kanë vra Astritin mundohen t’ia hedhin fajin njëri tjetrit. Këta më thonin shko në Prizren, ata më thonin shko në Prishtinë. Si t’i besojë një kryeprokurori të Prizrenit që më thotë e kamë dorëzuar në Prishtinë raportin dhe ai nuk e paska një kopje të. Nuk ka normë juridike që i arsyeton. Ne jemi detyruar për shkak të mosbesimit që kemi pasur në institucionine të drejtësisë në Kosovë, të kontaktojmë ekspertë të jashtëm. E mira do të ishte që ekspertiza të bëhet këtu, jo diku tjetër. Por i kanë shkel të gjitha procedurat që nga fillimi. Këta nuk i vret ndërgjegjja për këtë, nuk ua ndinë se përse nuk na kanë thirr kur kanë pranuar raportin. Nuk duan ta bëjnë transparent procesin, duan t’i fshehin faktet dhe për ne si familje është vrasje e dytë tani”, ka thënë ai.

Gruaja Astritit, Arta Boshtraj-Dehari, ka thënë se e gjitha çka po ndodhë është e papranueshme.

“M’u dok absurde nga kryeprokurori se si dërgohet raporti e nuk mbahet një kopje. Për mua është e papranueshme kjo që po ndodhë”, ka thënë ajo.

Edhe nëna e Astritit, Xhemile Dehari ka thënë se nuk mund ta kuptojë përse po i endin.

“Kemi thënë që çfarëdo raporti e pranojmë. Përse nuk është hapur zarfi përballë neve. Përse me marr ai dhe me shëtitë Prizren-Prishtinë. Ne e kemi cekur shumë herë që e pranojmë raportin çfarëdo që të jetë. Dhe e dimë çfarë ka ndodhur me arrestimin e Astritit. Ne e dimë që kjo nuk ka të bëjë asgjë me Vetëvendosjen”, ka thënë ajo./Telegrafi/