Autostrada Biennale zgjeron bashkëpunimin me ITP Prizren për edicionin e pestë

Autostrada Biennale ka njoftuar zgjerimin e bashkëpunimit me Parkun e Inovacionit dhe Trajnimeve (ITP Prizren), që përfshin hapësira shtesë për ekspozimin e veprave të artit bashkëkohor gjatë edicionit të pestë të këtij aktiviteti kulturor.

Marrëveshja është firmosur nga Drejtori dhe bashkëthemeluesi i Autostrada Biennale, Leutrim Fishekqiu dhe drejtori i ITP-së, Muhamed Rexhepi.

“Në kuadër të këtij partneriteti të zgjeruar, tre hangarë shtesë në ITP Prizren do të shndërrohen në hapësira ekspozuese për edicionin e 5-të të Autostrada Biennale. Ky bashkëpunim i qëndrueshëm, i bazuar në angazhimin e përbashkët për rigjallërimin e hapësirave dhe nxitjen e dialogut artistik, synon të vazhdojë të riformësojë peizazhin kulturor të rajonit”, thuhet në njoftimin e Autostrada Biennale, raporton Telegrafi.

Gjatë tre muajve të edicionit në fjalë, sipas njoftimit, këta hangarë do të funksionojnë si hapësira ekspozuese për artin bashkëkohor, me përfshirje aktive të komunitetit dhe shkëmbim kulturor e krijues.

Kuruar nga Erzen Shkololli, edicion i pestë i titulluar “Rrymat që shpalosen: Pulsi i kohës” do të mbahet nga data 5 korrik deri më 5 tetor 2025. /Telegrafi/