Arrestohet shoferi i kamionit që dyshohet se shkaktoi aksidentin me fatalitet në rrugën Zhur-Prizren

Një aksident i rëndë ndodhi mëngjesin e sotëm në rrugën Zhur-Prizren, ku mbeti i vdekur një person ndërsa u lënduan dy të tjerë. Në të u përfshinë një veturë dhe një kamion.

I dyshuar për këtë rast është vozitësi i kamionit, i cili është ndaluar për 48 orë nga Prokuroria Themelore në Prizren – Departamenti i Përgjithshëm.

Shoferi me inicialet B.K., dyshohet për veprën penale “Shkaktimi i rrezikut të përgjithshëm”.

Lexo po ashtu Një i vdekur e dy të lënduar në një aksident në rrugën Zhur-Prizren

Kështu ka bërë të ditur për Telegrafin zëdhënësja e kësaj prokurorie, Fitore Mehmeti.

“Lidhur me rastin të cilit i referoheni, ju njoftojmë se Prokuroria Themelore në Prizren – Departamenti i Përgjithshëm me urdhër të prokurorit ka ndaluar për 48 orë vozitësin e kamionit, përkatësisht personin me inicialet B.K., për shkak të dyshimit të bazuar se i njëjti ka kryer veprën penale “Shkaktimi i rrezikut të përgjithshëm” nga neni 370, të Kodit Penal të Republikës së Kosovës”, ka thënë Mehmeti.

Tutje, ajo ka shtuar se për të njëjtin, prokuroria brenda afateve ligjore do të vazhdojë me veprime të tjera hetimore.

Ndërsa, shefi i operativës së Policisë së Kosovës në njësinë e trafikut në Prizren, Azem Baraliu, ka deklaruar për Telegrafin se personat e lënduar janë dërguar për trajtim në Qendrën Klinike Universitare të Kosovës.

Sipas tij, viktima e aksidentit është pasagjeri i veturës./Telegrafi/