Arrestohet për korrupsion kreu i Federatës Spanjolle të Futbollit

Presidenti i Federatës Spanjolle të Futbollit, Angel Maria Villar, është arrestuar rreth orës 08:00, mëngjesin e të martës në Madrid gjatë një operacioni anti-korrupsion.

Akuzat që rëndojnë mbi të janë ato të shpërdorimit të fondeve si dhe falsifikim dokumentesh që lidhen me organizimin e ndeshjeve ndërkombëtare. Në pranga kanë përfunduar një grup prej 10 personash, përfshirë Gorkan, djalin e presidentit Villar njëherazi ish-drejtor i përgjithshëm i Conmebol, si dhe Juan Padron, zëvendëspresidenti për çështjet financiare në Federatën Spanjolle, transmeton SS.

Deri më tani nuk ka pasur asnjë prononcim zyrtar nga ana e avokatit mbrojtës të Villar, ndërkohë që vijojnë hetimet. Villar një ish futbollist me karrierë ndërkombëtare, qëndron në krye të Federatës Spanjolle të Futbollit që prej vitit 1988, duke e rinovuar mandatin e tij në zgjedhjet e shkuara të muajit maj. Nën drejtimin e tij, Kombëtarja spanjolle e futbollit numëron dy trofe të Kampionatit Evropian, si dhe Kupën e Botes në vitin 2010.

Njëherazi qe 29 vite, ai ka qenë pjesë e Komitetit Ekzekutiv të FIFA-s. Pozicioni i tij është delikat në këto hetime, pasi ai është njeë element mjaft i rëndësishëm në themelet e futbollit botëror. Prej vitit 1992, është zëvendëspresident i UEFA-s dhe nga viti 2000 zëvendëspresidenti i FIFA-s.

Arrestimi i tij është një mesazh i qartë dhe direkt se ende shume çështje që lidhen me drejtues të tjerë të futbollit botëror të dekadave të fundit, vijojnë të hetohen. Villar gjithashtu ka mbajtur edhe postin e president të përkohshëm të UEFA-s në kohen kur zhvilloheshin hetimet rreth Michel Platini.