Seriali i Netflix “Apple Cider Vinegar” (Uthulla e mollës), sjell historinë tronditëse të Belle Gibson, një influencuese australiane që u shtir sikur kishte kancer në tru dhe pretendonte se ishte shëruar vetëm me dietë të shëndetshme.
Seriali, me protagoniste Kaitlyn Dever, nis me një deklaratë të drejtpërdrejtë: “Kjo është një histori e vërtetë e bazuar në një gënjeshtër”, duke e vendosur tonin për atë që vjen më pas – një përzierje e kujdesshme mes faktit dhe trillimit.
Gibson, në fillim të viteve 2010, mblodhi miliona ndjekës duke ndarë rrëfimin e saj “frymëzues” dhe lançoi aplikacionin e famshëm “The Whole Pantry”, që u mbështet nga Apple dhe Penguin, shkruan The Guardian.
Ajo pretendoi se shumicën e fitimeve, mbi 1 milion dollarë australianë (përafërsisht 610,000 euro), do t’i dhuronte për bamirësi – por në realitet, vetëm 7,000 dollarë u dhuruan (përafërsisht 4,270 euro). Në vitin 2015 u zbulua se ajo nuk kishte pasur kurrë kancer.
Seriali, me gjashtë episode, është shkruar nga Samantha Strauss dhe bazohet në librin investigativ “The Woman Who Fooled the World” të gazetarëve Beau Donelly dhe Nick Toscano, të cilët zbuluan mashtrimin. Strauss thotë: “Ishte e rëndësishme për mua të tregoja që Gibson nuk është përfshirë dhe nuk është paguar për këtë histori”.
Seriali eksploron jo vetëm historinë personale të Gibson, por edhe shfaqjen e kulturës së mirëqenies, ndikimin e rrjeteve sociale dhe dëmin që pësonin të sëmurët e vërtetë që ndoqën këshillat e saj. Detajet më shqetësuese – si krizat e rreme, përplasjet me të afërmit dhe intervista famëkeqe në 60 Minutes – janë të bazuara në fakt dhe të rikrijuara me besnikëri.
Megjithatë, seriali merr edhe liri krijuese: përfshin skena fiktive si përdorimi i drogës apo marrëdhëniet e Gibson me persona të trilluar. Strauss thekson: “Kjo nuk është një përpjekje për ta shfajësuar. Doja të krijoja një portret të ndërlikuar, pa e justifikuar”.
Gibson u gjobit me 410,000 dollarë (përafërsisht 250,000 euro) në vitin 2017 për mashtrim, por fatura e saj tani ka kaluar 500,000 dollarë (përafërsisht 305,000 euro) dhe mbetet e papaguar. Ajo është larguar nga vëmendja publike, ndërsa pretendon se është “adoptuar” nga një komunitet etiopian në Melburn.
Për Strauss, shtysa për të treguar këtë histori ishte më shumë se sensacionalizëm: “Nuk dua të bëj punë që i shkakton dëm botës… Por ndiej se kjo histori ka diçka të rëndësishme për të thënë”. /Telegrafi/
