Apeli “zbutë’ dënimet ndaj një grupi të akuzuarish të njohur si rasti “Rolex’

Gjykata e Apelit e Kosovës, ka ulur dënimet për një grup të akuzuarish, në të ashtuquajturin rasti “Rolex”.

Sipas njoftimit për media të akuzuarin A.S., i cili nga gjykata e shkallës se parë ishte dënuar me 12 vjet burgim dhe 12 mijë e 500 euro gjobë, për veprën penale krim i organizuar nga neni 283 i Kodit Penal të Republikës së Kosovës, lidhur me veprën penale të grabitjes, nga neni 329, i të njëjtit kod, Apeli e gjykoi me 8 vjet burgim dhe 8 mijë euro gjobë.

“Të akuzuarit G.A. dhe Rr.A. dhe E.G., të dënuar secili veç e veç nga gjykata themelore, për të njëjtat vepra, me nga 11 vjet burgim dhe 12 mijë e 500 uro gjobë, Gjykata e Apelit i dënoi me nga 7 vjet burgim dhe nga 7 mijë euro gjobë.

Ndërsa të akuzuarin H.G., i cili ishte gjetur fajtor për veprën penale mbajtje në pronësi, kontroll dhe posedim të paautorizuar të armeve, për te cilën vepër ishte dënuar me 3 vjet burgim, kjo gjykatë e dënoi me 2 vjet burgim”, thuhet në njoftim.

Kolegji penal prej tre anëtaresh kësaj gjykate, gjeti se gjykata e shkallës se parë ka vërtetuar drejt gjendjen faktike dhe ka aplikuar drejt ligjin penal , kur të akuzuarit i ka shpallur fajtor, për veprat e lartcekura.

Ndërsa sa i përket vendimit mbi dënim, kolegji vlerësoi se vlerësimi i rrethanave renduese dhe lehtësuese, lidhur me peshën e veprës penale, shkallën e përgjegjësisë penale, gjendjen personale dhe ekonomike, nuk është bërë si duhet./Telegrafi/