Son Heung-min shkoi në polici pasi një burrë dhe një grua u përpoqën ta shantazhonin në Korenë e Jugut. Futbollisti i Tottenhamit dhe një nga sulmuesit më të mirë të Ligës Premier dyshohet se është kontaktuar nga një grua që pretendonte se mbante fëmijën e tij.
Një stacion policie në Seul konfirmoi se një grua rreth të 20-ave u arrestua me dyshimin për përpjekje për të zhvatur para. Një burrë u arrestua gjithashtu me dyshimin për tentativë zhvatjeje dhe dy të dyshuarit dyshohet se i kërkuan para Sonit në këmbim të heshtjes së tij, raportoi agjencia e lajmeve Yonhap.
Ekipi ligjor i Son tha se gruaja pretendoi se mbeti shtatzënë nga futbollisti në qershor 2024.
Son nuk është i martuar dhe nuk ka fëmijë. Ai më parë ka qenë në lidhje me yjet koreanë të muzikës pop, Bang Min-ah dhe Yoo So-young, por ka deklaruar vazhdimisht se nuk ka plane të martohet deri pas përfundimit të karrierës së tij në futboll.
Në një intervistë të vitit 2019, ai tha: "Babai im e thotë, dhe unë pajtohem - kur martohesh, përparësia është familja, gruaja dhe fëmijët, dhe vetëm pastaj futbolli. Dua që, ndërsa luaj në nivelin më të lartë, futbolli të vijë i pari. Nuk e di kurrë se sa gjatë do të luash në nivelin më të lartë. Pasi të dalësh në pension, në moshën 33 ose 34 vjeç, ke ende kohë të mjaftueshme për jetën familjare".
Son luajti për HSV dhe Bayer Leverkusen përpara se t'i bashkohej Tottenhamit në vitin 2015 në një transferim prej 30 milionë eurosh dhe tani është kapiteni i tyre.
Ai luajti 452 ndeshje për klubin londinez, duke shënuar 173 gola dhe duke asistuar 101 gola. Ai ka shënuar 11 gola dhe ka dhënë 12 asiste këtë sezon. Transfermarkt vlerëson vlerën e tij në 30 milionë euro. /Telegrafi/