Ambasadori rus: Rusia do të mbështesë Republikën Serbe të pavarur në BeH, por me një kusht!

Ambasadori rus në Bosnjë dhe Hercegovinë, Igor Kalabukhov ka thënë se ai nuk sheh asnjë problem në idenë e Milorad Dodik për një Republikë Serbe të pavarur brenda BeH.

Sidoqoftë, sipas mediave serbe, përcjell Telegrafi, ai ka shtuar se për këtë duhet të ketë një kusht – që një gjë e tillë të jetë rezultat i dialogut ndërmjet të gjitha palëve në BeH.

Siç vënë në pah mediat serbe, Kalabukhov tha se është çështje e politikanëve, vendimeve demokratike dhe se Rusia do ta mbështesë nëse “realizohet përmes dialogut”.

Ai tha se nuk mund të fliste për legjitimitetin apo jolegjitimitetin e procesit të kthimit të kompetencave nga BeH në Republika Srpska, duke theksuar se ishte çështje e procesit politik dhe autoriteteve në Republika Serbe.

Ndryshe, Milorad Dodik, kreu i SNSD-së dhe një anëtar i Presidencës së BeH-së, ka thënë më 12 tetor se po punonte hapur në projektin e një RS të pavarur brenda BeH-së, përpara seancës së presidencës së partisë së tij në Banja Luka. /Telegrafi/