Ambasadori i ri gjerman arrin në Prishtinë, sot merr detyrën

Ambasadori i ri gjerman, Jorn Rohde ka arritur sot së bashku me bashkëshorten e tij, Sonia Lapointe në Kosovë për të marrë detyrën.

Këtë e bëri të ditur vet ai përmes Twitter-it, ku falënderoi po ashtu ish-ambasadorin e Gjermanisë në Kosovë, Christian Heldt për mikpritjen.

“Të dashur ndjekës, në këtë ditë të bukur, unë dhe gruaja ime Sonia Lapointe arritëm në Kosovë. Sot do të marrë kredencialet e mia. E falënderoj ish-ambasadorin e Gjermanisë në Kosovë, Christian Heldt për këtë mirëseardhje të ngrohtë dhe shpresoj të ju takoj të gjithë juve këtu shumë shpejt”, shkruan Rohde.

Ndryshe, ditë më parë, tashmë ish-ambasadori gjerman Christian Heldt, ka përfunduar mandatin e tij si ambasador në Kosovë.

Para largimit nga Kosova, diplomati gjerman është shprehur i mërzitur që nuk do të mund të përshëndetet personalisht shkaku i pandemisë COVID-19.

“Nesër unë do të largohem nga Kosova pa pasur mundësinë të përshëndetem personalisht. Kjo është corona. Në një të ardhme të afërt, do të kthehem privatisht si mik për të parë të gjithë miqtë dhe për të bërë të gjitha gjërat që më ikën tani”, ka thënë Heldt.

Heldt tutje ka falënderuar të gjithë ata që e ndihmuan të zbuloj horizonte të reja.

“Sot unë vetëm mund të them faleminderit për 3 vjet, gjatë të cilave shumë njerëz më bënë të zbuloj horizonte të reja. Në gjermanisht është një shprehje që thotë “ende e kam një valixhe në Berlin”, kuptimi i së cilës është që ke lënë diçka pas tek e cila do të kthehesh sërish. E pra unë definitivisht po e lë në Kosovë një pjesë të madhe të valixhes time”, ka thënë Heldt. /Telegrafi/

Dear followers, on this beautiful day my wife Sonia Lapointe and I have arrived in #Kosovo. Today I will hand over my credentials. I thank @CHeldtBerlin for this warm welcome and look forward to meeting you all here soon… Yours, Jörn Rohde #staytuned pic.twitter.com/MR4zkYemgf

— Ambassador Jörn Rohde (@GermanAmbKOS) July 30, 2020