Ambasadori Hill: SHBA-ja nuk i miraton as nuk i koordinon veprimet e Prishtinës

Ambasadori amerikan në Serbi, Christopher Hill, duk folur për ngjarjet e fundit në veri të Kosovës, tha se SHBA-ja e ka bërë absolutisht të qartë se kjo situatë duhet të zgjidhet me dialog, duke mohuar se veprimet e Prishtinës janë miratuar as koordinuar me SHBA-në.

Në një intervistë për televizionin publik serb, duke iu përgjigjur konstatimit se shumë në Serbi besojnë se veprimet e fundit të Qeverisë së Kosovës janë miratuar dhe koordinuar me Shtetet e Bashkuara të Amerikës, Hill thotë se ky është informacion krejtësisht i pasaktë.

“SHBA-ja e ka bërë shumë të qartë, absolutisht të qartë se e ardhmja e kësaj situate duhet të zgjidhet përmes dialogut, përmes asaj që po bën Lajçak. Ne e mbështesim këtë vazhdimisht. Dhe mendoj se kemi qenë gjithashtu mjaft të qartë se jemi të pakënaqur kur dikush devijon nga dialogu ose ndërmerr hapa të njëanshëm. Duhet të them se Serbia, e di që kjo ishte shumë e vështirë për Serbinë, por Serbia i qëndron dialogut dhe mendoj se kjo është qasja e duhur. Do të duhet të shohim se si do ta kalojmë këtë. Por dua t’ju siguroj se është absolutisht qëndrimi ynë që dialogu i ka të gjitha elementet që mund t’i zgjidhin këto probleme dhe këto probleme duhet të zgjidhen me dialog”, tha Hill, tramsmeton Telegrafi.

I pyetur për hapat në çfarëdo drejtimi, sanksione ndaj administratës së Kurtit, Hill thekson se SHBA-ja e ka bërë shumë të qartë në disa raste ditëve dhe javëve të fundit se çfarë mendojnë se duhet bërë.

“Kemi qenë shumë të qartë për çështjen e urës në Mitrovicë. Ne jemi shumë të qartë edhe për nevojën absolute për formimin e Asociacionit të Komunave Serbe. Pra, mendoj se kemi dërguar mesazhe shumë të qarta dhe kemi qenë gjithashtu shumë të qartë se ata që devijojnë nga dialogu rrezikojnë të devijojnë nga politika jonë. Ajo që mund të them është se Serbia ka punuar shumë për këtë. Serbia ka bërë mirë duke iu përmbajtur dialogut dhe unë vërtet do ta inkurajoja Serbinë që të vazhdojë me këtë”, tha Hill. /Telegrafi/