Ambasada amerikane: Luftojeni korrupsionin, konfiskojeni pasurinë e paligjshme

Zëvendësshefja e misionit në Ambasadën e SHBA-së, Collen Hyland, në Kosovë ka thënë se pavarësisht disa sukseseve, Prokuroria e Shtetit duhet të luftojë seriozisht korrupsionin.

Ajo ka thënë se korrupsioni luftohet edhe duke sekuestruar pasurinë e paligjshme të kriminelëve dhe ka inkurajuar të bëjnë kërkesa të tilla.

Veç kësaj, ajo ka kërkuar që krimi dhe korrupsioni të luftohet në nivele të larta dhe të mos ketë ndjekje bazuar në përkatësinë etnike.

Në Konferencën vjetore të prokurorëve, Hyland përmendi sfidat që ka kaluar sistemi i drejtësisë në Kosovë gjatë vitin 2016.

Ajo tha se njëra nga sfidat ka qenë kur deputetët filluan të hedhin gaz lotsjellës në ambientet e Kuvendit, duke shtuar se Prokuroria e Shtetit e tejkaloi këtë sfidë në mënyrën më të mirë të mundshme.

“Jeni ballafaquar me shumë sfida, kur deputetët filluan të përdorin gazin lotsjellës. Kjo ishte sfidë dhe ju e tejkaluat atë siç duhet. Ju treguat se dhuna nuk ka vend në foltoren e kuvendit”, tha ajo, raporton Gazeta Express.

Zëvendës shefja e misionit paraqiti tri sfidat e sistemit të drejtësisë për këtë vit. Ajo porositi që Prokuroria e Shtetit të luftojë seriozisht korrupsionin.

“E para, t’i plotësoni vendet në prokurorinë speciale. Së dyti, Duhet të rrisni konfiskimin e pasurisë. Mënyra më e mirë për të luftuar korrupsionin është që kriminelëve tua merrni pasurinë. Duhet të prioritizoni ndjekjen në ato raste që do të keni më shumë ndikim. Qeveria e SHBA ka parë që Kosova është duke ecur në drejtimin e duhur, mirëpo nuk duhet që ndjekjet të bëhen në baza etnike”, tha Collen Hyland.