Alexander-Arnold pritet të marrë një bonus të ‘çmendur’ nëse transferohet tek Real Madridi

Zëvendëskapiteni i Liverpoolit, Trent Alexander-Arnold raportohet se do të marrë një bonus të ‘çmendur’ nënshkrimi në rast se i bashkohet Real Madridit.

Të besuarit e Arne Slot kanë shijuar një fillim fantastik të sezonit 2024/2025 teksa momentalisht janë lider në Ligën Premier dhe në Ligën e Kampionëve.

Liverpooli po ashtu është në rrugë të mirë për të mbrojtur titullin e Carabao Cup, teksa do të luajnë në gjysmëfinale ndaj Tottenhamit.

Sidoqoftë, ky fillim fantastik i sezonit të tyre ka marrë një shije të hidhur nga raportimet qe po e lidhin Alexander-Arnold me një kalim të mundshëm tek Real Madridi.

Është sugjeruar se trajneri Carlo Ancelotti dëshiron që klubi të përshpejtojë negociatat për ta sjellë Alexander-Arnold në kryeqytetin spanjoll sa më parë që të jetë e mundur.

Sipas The Sun, Alexander-Arnold mund të marrë një bonus nënshkrimi prej 100 milionë eurosh në rast se largohet nga Liverpooli në drejtim të Madridit.

Lexo po ashtu U tha se Alexander-Arnold tek Real Madridi është e kryer - Arne Slot përgjigjet ndaj këtyre raportimeve

“Real Madridi është i përgatitur që t’i ofrojë reprezentuesit anglez një rritje të madhe të pagës së tij prej 180 mijë eurosh në javë në Anfield, por paratë e vërteta janë ato të bonusit të nënshkrimit”.

“Ani pse Alexander-Arnold nuk do të mund të barazojë koston totale të transferimit të Mbappes prej 192 milionë eurosh, ai do të bëhet njëri prej lojtarëve më të paguar në botë”, thuhej në raport.

Liverpooli në ndërkohë do të rikthehet në aksion këtë vikend, ku do të presin në shtëpi Manchester United pasditen e së dielës./Telegrafi/