Aktorit Tom Cruise ia vjedhin BMW-në luksoze dhe bagazhet në vlerë mijëra euro gjatë kohës sa ai ishte në xhirime

Tom Cruise thuhet se i janë vjedhur bagazhe me vlerë mijëra eurosh pasi hajdutët morën BMW-në e truprojës së tij në vlerë prej 100,000 funtesh (116 mijë eurosh).

Ylli i filmit, 59 vjeç, aktualisht është në Mbretërinë e Bashkuar duke xhiruar skena për “Mission: Impossible 7” dhe u tha se ishte tejet i zemëruar kur mësoi për vjedhjen, shkruan DailyMail.

Sipas The Sun, hajdutët përdorën një skaner për të klonuar sinjalin nga ndezja e automjetit ndërsa ishte parkuar jashtë në parkingun e “The Grand Hotel” në Birmingham.

Një burim i tha tabloidit britanik: “Tom ka lëvizur gjatë gjithë kohës me veturë ndërsa ishte në Birmingham dhe disa nga bagazhet dhe gjërat e tij ishin brenda tij kur ai u vodh”.

“Policia më pas e ka gjetur veturën falë një pajisje elektronike të përcjelljes, por gjithçka brenda saj ishte zhdukur”, tha burimi.

“Është një siklet i madh për ekipin e sigurisë dhe djali që punon si shofer i aktorit ishte duke u çmendur – por jo aq i nervozuar sa Tomi!”, shtoi më tej burimi.

Truproja përgjegjëse për stafin e sigurisë së Tomit thuhej se kishte bërë zbulimin e veturës së vjedhur herët në mëngjes të mërkurën.

Burimet e brendshme thanë se hajdutët ishin në gjendje të vidhnin veturën vetëm brenda pak minutave pasi u la jashtë hotelit, i cili është vetëm dy minuta më këmbë nga selia e Policisë në West Midlands.

Thuhet se Tom po xhironte skenat për filmin e suksesshëm në një qendër tregtare në Birmingham së bashku me aktoren Hayley Atwell.

Truproja e kishte vozitur automjetin e Tomit – i cili mund të ecë nga 0-60 kilometra në orë në 4.7 sekonda – për ditë të tëra nëpër kryeqytet.

BMW mendohet të mos ketë qenë në një parking të sigurt, të mbrojtur nga barrierat që rekomandohet nga hoteli.

Tom ka udhëtuar për në Birmingham me helikopter nga një rezidencë luksoze në Kent dhe vetura kishte qenë në gatishmëri për ta mbledhur.

DailyMail ka kontaktuar përfaqësuesit e shtypit të Tom Cruise dhe Policisë së West Midlands për të marrë një koment mbi ngjarjen, por nuk janë prononcuar deri më tani.

Makinat moderne përdorin hyrjen pa çelës dhe mashtruesit kapin sinjale duke e bërë veturën të aktivizohet pa çelës automatik.

Kjo mund të mashtrojë veturën duke menduar se çelësi është afër dhe do të zhbllokohet. Pasi hajduti të jenë brenda automjetit, procesi mund të përsëritet për të ndezur motorin.

Hajdutët gjithashtu mund të kenë bllokuar çelësin automatik të shoferit duke transmetuar të njëjtën frekuencë radioje të përdorur për të kyçur makinën e cila më pas do t’u jepte atyre akses në pajisjet e saj kompjuterike.

The Sun raporton se kompania BMW furnizoi aktorin me një veturë identike zëvendësuese brenda disa orësh nga vjedhja. /Telegrafi/