Aktakuzë kundër një femre për organizim dhe pjesëmarrje në grup terrorist

Prokuroria Speciale e Republikës së Kosovës, ka ngritur aktakuzë kundër të pandehurës me inicialet J.L. për shkak të veprës penale “Organizimi dhe pjesëmarrja në grup terrorist”.

Prokuroria Speciale njofton se e pandehura J.L. më 12.09.2014, me paramendim dhe me dashje si dhe me përgatitje paraprake, me qëllim që t’i bashkëngjitet organizatës terroriste “ISIS” në Siri, përmes Aeroportit Ndërkombëtar “Adem Jashari” në Prishtinë, së bashku me nënën e saj F.L, motrën L.L dhe E.K., kanë udhëtuar për në Stamboll ku edhe janë takuar me babanë e saj N.L. i cili ka udhëtuar nga Aeroporti i Shkupit, e më pastaj me aeroplan kanë shkuar në qytetin Gazientep afër kufirit me Sirinë ku përmes pjesëtarëve të ISIS-it, janë kontaktuar me vëllain e saj B.L., të cilët i kanë transportuar fillimisht në qytetin Gjerablus, pastaj në qytetin Sedel Faruk.

Në njoftim po ashtu thuhet se po ashtu, e njëjta është angazhuar në pikëpamje logjistike me përgatitjen e ushqimit pastrimin e rrobave ushtarake si dhe është financuar nga ISIS-i, me shumën e të hollave prej nga 50-100 dollarë në muaj dhe se në këto zona të konfliktit kanë kontaktuar edhe me L.M., Q.T., R.Q., A.A.

Po ashtu, e pandehura ka poseduar edhe një pushkë automatike të bashkëshortit të saj e që në këto zona të konfliktit ka vepruar deri në muajin gusht të vitit 2018, ku edhe është arrestuar nga forcat demokratike Siriane, e që më 19.04.2020 e njëjta është riatdhesuar në Kosovë.

Sipas njoftimi të Prokurorisë, me këto veprime e pandehura J.L., ka kryer veprën penale “Organizimi dhe pjesëmarrja në grup terrorist”. /Telegrafi/