Ai paralajmëroi se lufta mund të shpërthejë në çdo moment – kush është Rob Bauer, admirali dhe kreu ushtarak i NATO-s

Paralajmërimet se janë vite të vështira përpara admiralit holandez Rob Bauer, i cili kryeson komitetin ushtarak të NATO-s, po dëgjohen gjithnjë e më shumë në media.

Në vetëm pak ditë, Bauer paralajmëroi se pushtimi i Ukrainës nga Rusia do të ketë pasoja edhe për pjesën tjetër të Evropës.

Ai u bëri thirrje sektorëve publikë dhe privatë në Perëndim që të përgatiten për një epokë në të cilën çdo gjë mund të ndodhë në çdo kohë, përfshirë luftën.

“Ne kemi nevojë për një transformim të NATO-s gjatë kohës së luftës”, tha ai në hapjen e fundit të takimit të ministrave të mbrojtjes të NATO-s në Bruksel.

“Anëtarët e NATO-s duhet të përshtaten me pushtimin rus të vitit 2022 në një epokë në të cilën çdo gjë mund të ndodhë në çdo kohë, një epokë në të cilën ne duhet të presim të papriturën, në të cilën ne duhet të fokusohemi te efikasiteti që të jetë vërtet efektiv”, tha ai.

Lexo po ashtu Njerëzit duhet të përgatiten për luftë gjithëpërfshirëse me Rusinë, thotë zyrtari lartë i NATO-s

Bauer, kryetar i komitetit ushtarak të NATO-s, deklaroi gjithashtu se ekziston rreziku real që Rusia të sulmojë një nga anëtarët e NATO-s.

Ushtaraku thotë se ambiciet e Rusisë nuk do të ndalen në kufijtë e Ukrainës. “Prandaj është e rëndësishme që ata të mos e fitojnë këtë luftë dhe ta ndalojmë atë ambicie. Ne duhet të përgatitemi për vetëmbrojtje. Nëse jeni të përgatitur për luftë, shanset për të ruajtur paqen janë shumë më të mëdha sesa nëse nuk jeni. Nuk po them se do të ndodhë nesër, por duhet të përgatitemi më mirë për luftën me Rusinë”, tha holandezi.

Së fundmi, duke iu përgjigjur pyetjes së një gazetari, ai deklaroi se është mirë që suedezët, vendi i të cilëve dëshiron të bëhet anëtar i NATO-s, të përgatiten mendërisht për luftë.

“Duhet të keni ujë, një radio me bateri dhe një elektrik dore me bateri në shtëpi për të funksionuar për ditët e para. Këto janë gjërat themelore. Nuk po them se nesër gjërat do të shkojnë keq, por nuk mund të jemi të sigurt se paqja do të zgjasë përgjithmonë. Kjo është arsyeja pse ne kemi plane mbrojtëse”, tha Bauer.

Ky i fundit theksoi gjithashtu se ushtria ruse “mund të përbëjë ende një kërcënim të madh dhe nuk duhet të nënvlerësohet” për shkak të aftësive të saj të përgjithshme.

Robert Peter Bauer ka lindur më 11 nëntor të vitit 1962 në Holandë.

Ai është një admiral me katër yje në Marinën Mbretërore të Holandës.

Bauer u diplomua në Kolegjin Mbretëror Detar në vitin 1981 dhe më pas iu bashkua Marinës Mbretërore të Holandës.

Që nga qershori i vitit 2021, ai është kryetar i Komitetit Ushtarak të NATO-s, pasi pasoi Shefin e Forcave Ajrore, Marshall Stuart Peach.

Bauer ishte më parë Shef i Mbrojtjes nga tetori i vitit 2017 deri në prill të vitit 2021, Zëvendës Shefi i Mbrojtjes i Forcave të Armatosura të Holandës nga 1 shtatori i vitit 2015 deri më 13 korrik të vitit 2017.

Lexo po ashtu Udhëheqësi ushtarak i NATO-s: Rezultati i luftës në Ukrainë do të përcaktojë fatin e botës

Ai ishte i përfshirë në operacione anti-terroriste dhe kundër piraterisë në Detin Mesdhe dhe në Bririn e Afrikës.

Gjatë pushtimit rus të Ukrainës, Bauer inicioi masa që synonin forcimin e masave mbrojtëse të NATO-s në Evropën Lindore, siç janë shtetet baltike dhe ish-anëtarët e Paktit të Varshavës.

Forca e Reagimit të Shpejtë u zgjerua nga 40 mijë deri në 300 mijë ushtarë dhe ai është përgjegjës për krijimin dhe vendosjen e katër grupeve të reja beteje në Rumani, Sllovaki, Bullgari dhe Republikën Çeke.

Bauer ka bërë gjithashtu përpjekje për të përshpejtuar aplikimin e Finlandës në NATO dhe po ndihmon Suedinë të bashkohet me Aleancën.

Bauer, fitues i një duzinë çmimesh dhe medaljesh, vjen nga një familje inxhinierësh.

Ai është i martuar me Mike Bauer dhe kanë tre fëmijë. /Telegrafi/