Abelard Tahiri: Qeveria Kurti ia gjeti çelësin “Kishës së Millosheviqit” si dhuratë për Vuçiqin

Shefi i Grupit Parlamentar të Partisë Demokratike të Kosovës, Abelard Tahiri ka ka reaguar pas liturgjisë së Kishës Ortodokse Serbe të mbajtur sot në kampusin e Universitetit të Prishtinës.

Përmes një shkrimi në Facebook, tha se Qeveria Kurti ia gjeti çelësin “Kishës së Millosheviqit” si dhuratë për Vuçiqin.

“Kishës” së pretenduar e të kontestuar që u ndërtua dhunshëm në oborrin e Universitetit, e cila simbolizon terrorin e Millosheviçit, qeveria Kurti ia paska gjetur çelësin. Ende pa arritur në tryezën e bisedimeve me Vuçiqin, kryeministri qenka kujdesur t’i bëjë “dhuratë” sa për t’ia ndrequr disponimin. E nesër në seancë, sigurisht se do të na flet për parime e kësi gjerash”, ka shkruar ai në Facebook.

Ndaj liturgjisë së Kishës Ortodokse Serbe, ka reaguar edhe KLMDNj.

Lexo po ashtu Për herë të parë pas luftës, serbët kryejnë ritet fetare në kishën që ndodhet në oborrin e kampusit të Universitetit të Prishtinës

Këshilli për Mbrojtjen e të Drejtave dhe Lirive të Njeriut, e ka parë provokim mbajtjen e liturgjisë fetare të enjten në objektin e papërfunduar të kishës e cila ndodhet në oborrin e Kampusit Universitar të Prishtinës.

KMDLNj ka tërhequr vërejtjen për këto veprime të kishës ortodokse serbe, sepse sipas tyre, do të provokohen studentët e UP-së.

“KMDLNj e njeh dhe respekton të drejtën e ushtrimit të drejtave dhe lirive fetare për të gjithë besimtarët në bazë të bindjeve dhe vullnetit por e kundërshton manipulimin e fesë për qëllime politike. Rasti i mbajtjes së Liturgjisë në një objekt të papërfunduar dhe me status të parregulluar, KMDLNj e konsideron si provokim”, thuhet në reagimin e tyre.

Sipas KMDLNj-së, ky veprim i kishës ortodokse serbe është bërë për shkak të ndjeshmërisë së situatës politike në Kosovë.

“Kisha Ortodokse serbe, e sigurt se për shkak të ndjeshmërisë së situatës politike në Kosovë askush nuk do të intervenojë e ka keqpërdorur për qëllime politike një aktivitet shpirtëror dhe fetar. Këso aktivitete nuk duhet të lejohen në të ardhmen aq më parë që në Prishtinë dhe rrethinë ka hapësira të mjaftueshme dhe funksionale për ushtrim të aktiviteteve fetare”, vazhdon më tej reagimi. /Telegrafi.