KPK e Zyra e Kryeprokurorit dënojnë ashpër deklaratat e Armend Mujës ndaj kryeprokurorit Isufaj

Këshilli Prokurorial i Kosovës (KPK) dhe Zyra e Kryeprokurorit të Shtetit (ZKPSH) kanë reaguar ashpër ndaj deklaratave të deputetit të Lëvizjes Vetëvendosje, Armend Muja, i cili sot, më 22 tetor 2024, ka akuzuar Kryeprokurorin e Prokurorisë Speciale, Blerim Isufaj, për ndikim në hetime.

Muja, përmes një postimi në Facebook, ka pretenduar se biznesmeni nga Shqipëria, Saimir Mane, ka pasur ndikim në miratimin e ligjeve në Kosovë gjatë kohës së Qeverisë Hoti.

Ai ka theksuar një amandament të propozuar nga Grupi Parlamentar i AAK-së për Ligjin e Rimëkëmbjes Ekonomike, i cili parashihte lirimin nga pagesa e energjisë elektrike për Ferronikelin, kompani në pronësi të Mane në atë kohë, si dhe pezullimin e pagesave të rentës minerare.

Muja ka shtuar se Komisioni i Minierave dhe Mineraleve (KPMM) nuk e kishte ngarkuar Ferronikelin me pagesa të rentës minerare, dhe ka pyetur publikisht nëse Prokuroria e Kosovës ka hetuar këtë çështje.

Në reagimin e tyre, KPK dhe ZKPSH kanë dënuar deklaratat e Mujës, duke i cilësuar si sulme politike të drejtuara për të dëmtuar hetimet dhe për të zhvendosur vëmendjen nga puna e Kryeprokurorit Isufaj.

“Deklaratat e sotme të deputetit Muja kanë përmbajtje të pastër politike dhe vijnë në sinkron me deklaratat e Qeverisë dhe deputetëve të partisë shumicë, të cilët duhet të jenë mbrojtës të së drejtës dhe sundimit të ligjit, jo të ndërhyjnë duke sulmuar prokurorët e vendit,” thuhet në reagimin e këtyre institucioneve.

KPK dhe ZKPSH kanë rikonfirmuar mbështetjen e tyre të plotë për Kryeprokurorin Isufaj dhe të gjithë prokurorët që punojnë në ndjekjen e kryesve të veprave penale.

Deklaratat e Mujës lidhen me hetimet që përfshijnë kryetarin e Partisë së Lirisë në Shqipëri, ish-presidentin Ilir Meta, dhe bashkëshorten e tij, Monika Kryemadhi, të cilët sipas SPAK-ut, kanë ndikuar në ndryshimin e një ligji në favor të biznesmenit Mane në Kuvendin e Shqipërisë./Telegrafi.