Padia ndaj Google për diskriminimin e gjuhës shqipe, ku ndodhet procesi? Gjithçka nga intervista me Neshad Asllanin

Gjiganti teknologjik “Google” është paditur kohë më parë për diskriminim pasi nuk ka përfshirë gjuhën shqipe në listën e gjuhëve të mbështetura nga kjo korporatë.

Lobisti Haki Dervishi, shtetas amerikan dhe doktor, Neshad Asllani, njëherit edhe Rotarian e çuan këtë çështje në Gjykatën e Lartë të Kalifornisë, duke theksuar se ky përjashtim ka ndikuar në aspekte të ndryshme të zhvillimit në vendet ku flitet shqip.

Neshad Asllani gjatë intervistës për Telegrafin ka deklaruar se kjo padi është bërë për shkak të diskriminimit të gjuhës shqipe.

“Ne jemi befasu shumë kur e kemi pa një njollë të zezë në Evropë, ku Evropa është tërë e kaltër për shkak të mbështetjes nga Google, ndërsa njolla e zezë në vendin ku flitet gjuha shqipe. Pra, Kosovë, Shqipëri, Maqedoni e Veriut dhe në diasporë. E kjo pikë, kjo njollë e zezë na ka shqetësu si Hakiun edhe mu, që të ndërmarrim diçka”, tha ai.

Lexo po ashtu Beteja ligjore kundër “Google” për diskriminimin e gjuhës shqipe, Asllani jep detajet e padisë

Asllani thotë se: “Pas pranimit të padisë, Google ka dërguar jo menjëherë, por pas nja 10 dite, një letër tek ne, e-mail, kërkesë për me e shty këtë seancë që ata mund të përgjigjen në këtë padi, dhe kanë kërku 15 ditë. Kjo është dërgu tek Hakiu, te unë dhe te këshilltarët tonë. Ne jemi këshillu me ata dhe kanë thënë që mund të nënshkruani, mund ta jepni pëlqimin, se është e zakonshme në sistemin amerikan që të jepet pëlqimi. Është një veprim i mirë që Google ka kërku që para 18 dhjetorit të ulemi e të bisedojmë”, thotë Asllani.

Po ashtu, Asllani ka njoftuar se lidhu me padinë i ka informuar ambasadat e Shqipërisë dhe Kosovës në ShBA.

Lexo po ashtu Gjykata e Kalifornisë konfirmon padinë ndaj Google për diskriminim të Gjuhës Shqipe - gjiganti teknologjik kërkon shtyrjen e afatit deri më 18 dhjetor

Asllani tha se kanë pritur që ambasadat do t’i njoftojnë qeveritë e tyre për këtë padi, pasi siç u shpreh ai është në interes shtetëror “edhe të hyrat, edhe të ardhurat do të shtohen edhe për shtet”.

“Pas ushtrimit të padisë, ne e kemi informuar edhe ambasadën e Shqipërisë në SHBA dhe ambasadën e Kosovës në SHBA. Ky njoftim nuk është ba vetëm me e-mail, po edhe me letër që është dërgu me postë si hard copy. Ne kemi prit që edhe ambasada, normal që e njofton edhe Ministrinë e Punëve të Jashtme në shtetet respektive Shqipëri edhe Kosovë, apo Qeveria do të interesohet pak për këtë çështje, se është me rëndësi jo vetëm për ne, jo vetëm për biznese, po edhe të hyrat, edhe të ardhurat do të shtohen edhe për shtet, për shkak të taksave që do të jenë…”, ka thënë ai. /Telegrafi/