Për herë të parë në histori, më pak se 50 për qind e britanikëve e identifikuan veten si të krishterë

Regjistrimi i vitit 2021 tregoi rritje të shpejtë të popullsisë myslimane, por “pa fe” ishte përgjigja e dytë më e zakonshme pas krishterimit, njoftoi sot Zyra e Statistikave Kombëtare të Mbretërisë së Bashkuar.

Në një epokë gjithnjë e më laike, Kryepeshkopi i Jorkut, Stephen Cottrell, tha se nuk ishte “çudi e madhe” që përqindja e të krishterëve po binte me kalimin e kohës.

Por ai tha se, përballë krizës së kostos së jetesës dhe luftës në Evropë, njerëzit ende kanë nevojë për ushqim shpirtëror.

“Ne do të jemi aty për ta, në shumë raste, duke ofruar ushqim dhe ngrohtësi. Dhe në Krishtlindje, miliona njerëz do të vijnë ende në shërbimet tona. Në të njëjtën kohë, ne do të shikojmë përtej mjedisit tonë të afërt, duke kujtuar se jemi pjesë e një besim global, lëvizja më e madhe në Tokë dhe shpresa e saj më e madhe për një të ardhme paqësore dhe të qëndrueshme”, tha kryepeshkopi.

Çështja për fenë iu shtua regjistrimit të popullsisë në vitin 2001. Përgjigja për këtë pyetje mbetet vullnetare, por sipas ONS, 94.0 për qind e të anketuarve e bënë këtë.

Rreth 27.5 milionë njerëz ose 46.2 për qind në Angli dhe Uells e përshkruan veten si të krishterë, një rënie prej 13.1 për qind nga viti 2011, raporton euronews.

Përgjigja “Pa fe” është rritur në 37.2 për qind ose 22.2 milionë, ndërsa myslimanët janë 3.9 milionë apo 6.5 për qind e popullsisë, krahasuar me 4.9 për qind të mëparshme. Përgjigjet e radhës më të zakonshme ishin hinduizmi me 1 milion dhe sikizmi me 524 mijë.

ONS publikoi gradualisht pjesë kyçe të regjistrimit të popullsisë të vitit të kaluar dhe i fundit trajtoi fenë dhe identitetin etnik. Të dhënat për Skocinë dhe Irlandën e Veriut publikohen veçmas. /Telegrafi/