Sekuestrimi i vajit pa dokumentacion dhe mbyllja e depove – analistët komentojnë veprimet e Prokurorisë

Analistët politikë kanë komentuar aksionin e inspektorëve të tregut që në koordinim me Policën e Kosovës kanë sekuestruar qindra litra vaj që u gjet pa dokumentacione në depot e marketeve.

Aksioni u ndërmarrë javën e kaluar pas ngritjes së çmimit të vajit që u bë nga 1.60 Euro në 3.49 Euro, transmeton Telegrafi.

Analisti Yll Hoxha, ka thënë se ndërhyja ka qenë e nevojshme në mënyrë që të ndalet ngritja e çmimeve.

“Ka pasje sjellje jo etike të operatorëve ekonomik karshi krizës ekonomike, dhe kjo sjellje ka shku prej ngritjes së çmimit deri të përpjekja për dakordim apo edhe vetë fshehja të mallit për të shkaktuar krizë. Se ka pas nevoje të intervenohet është e padiskutueshme, nëse kemi vepru gabimisht duhet të krijojmë mekanizma që e mbrojnë tregun prej këtyre manipuluesve. Ka pas nevojë të ndalohet ngritja e çmimit”, ka thënë ai në Debat Plus të RTV Dukagjini.

Lexo po ashtu Ngritja e çmimeve: Inspektorët dhe policia në aksion - vaj i sekuestruar dhe depo të mbyllura

Kurse, analisti Vehbi Kajtazi deklaroi se ndërhyrja ishte e paligjshme.

“Ndërhyrja është e paligjshme, nuk mundet me polici me rregullu shtetin, kjo është skandaloze. Vetëm një operator e ka rritur çmimin 3.49 euro të vajit. Operatorët tjerë kanë pasur  çmime tjera.

Po flasim vetëm për një operator, pra duke pasur parasysh atë që ka pasur çmime të ndryshme të vajit, Prokuroria iu ka nënshtruar aparatit shtetëror”, tha ai.

Javën që lamë pas u mbyllën edhe dy depo të vajit në Fushë Kosovë dhe Graçanicë, dhe u bënë inspektime të shumta në markete. /Telegrafi/