Quad – udhëheqësit e SHBA-së, Japonisë, Indisë dhe Australisë takohen në Washington

Udhëheqësit e Shteteve të Bashkuara, Japonisë, Indisë dhe Australisë u takuan të premten për një samit mes shqetësimeve të përbashkëta në lidhje me fuqinë në rritje të Kinës dhe sjelljen, një takim që pritet të japë progres në vaksinat kundër COVID-19, infrastrukturën dhe bashkëpunimin teknologjik.

Sipas Reuters, përcjell Telegrafi, takimi i parë sy më sy i Quad, siç edhe quhet grupi i katër demokracive kryesore, do të shikohet nga afër në Pekin derisa kjo kritikoi grupin.

“Ne qëndrojmë këtu së bashku, në rajonin Indo-Paqësor, një rajon që ne dëshirojmë të jemi gjithmonë të lirë nga shtrëngimi, ku respektohen të drejtat sovrane të të gjitha kombeve dhe ku mosmarrëveshjet zgjidhen në mënyrë paqësore dhe në përputhje me ligjin ndërkombëtar”, ka deklaruar kryeministri australian Scott Morrison në fillim të takimit.

Presidenti amerikan Joe Biden, u takua së pari me kryeministrin indian, Narendra Modi në Zyrën Ovale, dhe më pas iu tha partnerëve të tij të Quad se një iniciativë vaksine që është rënë dakord në një samit virtual Quad në muajin mars “ishte në rrugën e duhur për të prodhuar 1 miliard doza shtesë të vaksinave në Indi për të rritur furnizimin total”.

Modi deklaroi në takimin Quad se nisma do të ishte një ndihmë e madhe për vendet në rajonin Indo-Paqësor.

Në takim ishte i pranishëm gjithashtu edhe kryeministri japonez  Yoshihide Suga i cili tha se takimi tregoi një solidaritet të fortë midis vendeve dhe “angazhimin e tyre të palëkundur për një… Indo-Paqësor të lirë dhe të hapur”.

Quad pritet të njoftojë disa marrëveshje të reja, duke përfshirë një për të forcuar sigurinë e zinxhirit të furnizimit për gjysmëpërçuesit dhe për të luftuar peshkimin ilegal dhe për të rritur ndërgjegjësimin për fushën detare, tha një zyrtar i lartë amerikan, duke iu referuar nismave të nxitura nga shqetësimet për Kinën. Quad gjithashtu do të krijojë një partneritet 5G dhe plane për monitorimin e ndryshimeve klimatike.

Takimi vjen pak më shumë se një javë pasi Shtetet e Bashkuara, Britania dhe Australia njoftuan një pakt sigurie AUKUS sipas të cilit Australia do të pajiset me nëndetëse me energji bërthamore, një veprim që është denoncuar në mënyrë të prerë nga Pekini. /Telegrafi/