Armend Halili me tri oferta nga ekipet e Superligës së Kosovës

Ndërkohë që vëmendja e futbolldashësve është përqendruar tek Kampionati Botëror afati kalimtar në futbollin e Kosovës ka filluar të intensifikohet.

Për Armend Halilin mund tu ketë rastisur të mos dëgjoni edhe shumë shpesh, por ai nuk i ka ikur syrit të ekspertëve të futbollit kosovar.

Së fundmi merret vesh që Halili ka marrë oferta nga tri ekipe të Superligës kosovare dhe është në proces të përzgjedhjes. Deri te ky interesim për Armend Halilin ka ardhur pas një karriere dhe përkushtimi të tij në ekipet vendore.

Ai shquhet sidomos për qetësi dhe organizim të mbrojtjes, gjë që është vendimtare në këtë repart të ekipit. Halili vetë nuk ka dashur të komentojë rreth ofertave të mundshme nga Superliga.

“Ka pasur interesim, por nuk mund të flas asgjë derisa të mos ketë një konkretizim final. Për momentin jam i koncentruar në stërvitje dhe në mbajtje të formës”, ka thënë ai pa pranuar që të bëjë me dije emrat e ekipeve që kanë shprehur interesim për të.

Fillimisht i angazhuar në ekipin e futbollit Ramiz Sadiku ku i mori hapat e parë si futbollist, e më pas i spikatur nga udhëhqësia e KF Kukësi si mbrojtës i krahut të majtë.

Edhe pse karakter i qetë, Halili në fushë shndërrohet në barrierë, ndërsa si armë e tij e fortë konsiderohen depërtimet nga ana e majtë të karakterizuara nga krosimet e forta dhe të sakta. Pikërisht ky detaj ua tërhoqi vëmendjen edhe udhëheqësve të KF Hajvalia në vitin 2016, kur edhe ishte pjesë e Superligës.

Armend Halili e dëshmoi veten si lider në gjysmën e sezonës së kaluar kur Liridon Kukaj u tërhoq nga KF KEK-u, duke i lënë Halilit tërë barra e organizimit të mbrojtjes në fushë.

Futbollisti i krahut të majtë, Armend Halili e ka përfunduar sezonën me KF KEK-u, duke i ndihmuar ekipit me kontributin e tij që të jenë pjesë e Superligës së Kosovës në këtë sezonë, ku edhe u shpall kampion.

Afati kalimtar është hapur më 18 qershor dhe do të përmbyllet më 17 gusht. Ndërkohë, edicioni i ri garues në Superligë do të fillojë më 18 gusht.