Më 20 gusht Tetova voton për Këshill Komunal, KZK i ka kryer parapërgaditjet për procesin zgjedhor

Komisioni zgjedhor komunal i Tetovës ka bërë gjitha parapërgatitjet e duhura për zgjedhjet lokale të gushtit, ku do votohet për këshilltarë komunal.

Kreu i Komisionit zgjedhor komunal Nazmi Dauti, tha se po bëhet revidimi i listave të komisionerëve ndërsa po rrjedh afati i dorëzimit të listave.

“Kemi filluar me gjitha parapërgatitjet e duhura për realizimin e procesit zgjedhorë që do mbahet më 20 gusht. Komisioni tani bën revidimin e listave të anëtarëve të këshillave zgjedhor. Afatin e fundit për pranimin e listave nga ana e partive politike apo të pavarurve e kemi deri më 15 korrik në ora 24, dhe të njëjtët duhet t`i dorëzojnë listat, ndërsa më pastaj brenda 24 orëve komisioni do shqyrtojë ato lista dhe nëse ka parregullsi njoftohen të njëjtat që ti përmirësojnë brenda 24 orëve dhe të sjellim vendimin për pranim apo jo të listës së dorëzuar”, tha Nazmi Dauti – Kryetar i KZK për Alsat.

Deri më tani asnjë parti politike, nuk ka dorëzuar listat e kandidatëve për këshilltarë.

Ndërsa partitë që planifikojnë të garojnë thonë se akoma s’është vendosur për koalicionime.

“Deri më tani nuk ka ndonjë koalicion. Ka pasur bisedime vetëm me ASH por deri më tani nuk ka ndonjë koalicion mes nesh. Më 12 korrik Lëvizja Besa ka thirrur kuvendin qendror ku do diskutohet për listat e këshilltarët dhe do jepen propozime pas çka do merret vendimi i partisë”, u shpreh Besar Durmishi nga Lëvizja BESA.

“ Ditëve në vijim kryetari i sapozgjedhur i degës bashkë me organet e tjera të partisë dhe kryetarin Ahmeti, do shqyrtojmë gjitha rrethanat për punën e këshillit dhe zgjedhjeve dhe do dalim me qëndrim konkret”, theksoi Blerim Osmani nga Bashkimi Demokratik për Integrim.

Të njëjtën përgjigje morëm edhe nga Aleanca për shqiptarët.

Bisedime ka por jo dhe vendime për koalicione konkrete.

Ndërkohë në garë sërish do të hyjë edhe Lista e pavarur “Më mirë për Tetovën”.

Kjo nismë filluan mbledhjen e nënshkrimeve.

“Ne përsëri kemi ndërtuar listën e 31 kandidatëve dhe sërish do kandidojmë për këshilltarë në komunën e Tetovës. Tani kemi nevojën e mbledhjes së nënshkrimeve”, tha Elmedina Abdullahu nga Lista e Pavarur “Më mirë për Tetovën”.

Më 20gusht në Tetovë do të votohet në gjithsej 117 vendvotime, ndërsa numri i votuesve, pritet të jetë rreth 83 000.

Shpërbërja e këshillit të komunës së Tetovës u bë pasi paraprakisht nuk u arrit të miratohet llogaria përfundimtare e buxhetit, deri në 31 mars ashtu siç parashikonte ligji për vetëqeverisje lokale.