Zogaj: Betejat e shqiptarëve para nëntorit të vitit 1912, nuk ishin të organizuara mirë në aspektin ushtarak (Video)

Historiani Agim Zogaj ka thënë se realitetet për të arritur te 28 nëntori i vitit 1912 ishin jashtëzakonisht të vështira.

“Populli shqiptar nuk kishte aleat dhe përkrahës para dhe pas Kongresit të Berlinit. Falë betejave titanike, veçanërisht falë kryengritjeve në Kosovë populli shqiptar bëri atë që mund të bënte. Në ato rrethana ishte e pamundur të mbroheshin edhe territoret shqiptare që mbeten jashtë Shqipërisë”.

Zogaj në emisionin “Debat Plus” me Ermal Pandurin në RTV Dukagjini ka thënë se shqiptarët nuk kishin aleanca as në diplomaci dhe as aleanca ushtarake.

“Shqiptarët mezi e gjetën një territor të lirë në Vlorë për të shpallur pavarësinë, sepse Kosova ishte në zjarr e flakë”.

Historiani thotë se ishte e çartë se pas tërheqjes së forcave turke ishte e qartë se një pjesë e territoreve shqiptare do të mbeteshin jashtë shtetit shqiptar.

“Tërheqja pa kushte e turqve nga territoret shqiptare iu la hapësirë shteteve ballkanike të synonin tokat shqiptare. Shqiptarët u mbrojtën me mjete vetanake aq sa munden sidomos në Kosovë”.

Zogaj tha se shqiptarëve në këto luftëra për çlirim u mungoi një strateg ushtarak siç ishte Gjergj Kastrioti – Skenderbeu.

“Lëvizjes sonë kombëtare në periudhat para nëntorit të vitit 1912 i mungoi një strateg ushtarak i kalibrit të Gjergj Kastriotit…Betejat nuk ishin të organizuara në aspektin ushtarak”, deklaroi më tej Agim Zogaj./Telegrafi/