Zhdukja e mostrave të Astrit Deharit, Haxhiu: Frikën e kam pasur nga burgjet jo nga Mjekësia Ligjore

Ministrja e Drejtësisë, Albulena Haxhiu ka hedhur akuza të rënda ndaj zyrtarëve të Institutit Mjekësisë Ligjore.

Në RTV Dukagjini ajo ka thënë se në atë institucion punonjësit kanë raporte të tmerrshme kolegiale.

“Ata kanë gjetur Rastin e Astritit [zhdukja e mostrave të gjakut] për të më goditur mua dhe dikënd tjetër. Sipas meje e kanë gjetur këtë rast pasi është i ndjeshëm. Astriti ishte edhe aktivist i LVV-së. Besoj mund të kuptohet lehtë si janë humbur provat pasi kanë qenë vetëm tre persona”.

E pyetur nëse mban përgjegjësi politike për zhdukjen e mostrave të gjakut ta Astrit Deharit, Haxhiu ka thënë se qëllimi ishte pikërisht goditja e saj.

“Qëllimi ka qenë që të goditem unë. Përmes dorëheqjes sime unë nuk mund t’i lumturojë ata që tentojnë të pengojnë zbardhjen e Rastit Dehari.

“Unë frikën e kam pasur te institucionet korrektuese se mos dikush bën diçka që përgjegjësi të hidhet te unë. Por asnjëherë nuk më ka shkuar mendja që edhe për shkak të raporteve kolegiale, që të mos lihet të bëhet drejtor atje dikush të bëhen veprime të tillë në IML”, ka deklaruar Haxhiu./Telegrafi/