“Zhdukja” dhe rikthimi i Bashës, plani i kryedemokratit pas 16 muajve në hije

Lulzim Basha duket se nuk do të humbasë më kohë dhe fill pas rikthimit të tij në krye të Partisë Demokratike ka nisur aksionin opozitar.

Përgjatë 16 muajve që qëndroi në hije, Basha duket se ka hartuar një plan të detajuar për atë se çfarë do të bëj për të kontrolluar partinë, por edhe për të bërë opozitë ndaj maxhorancës socialiste.

E diela e parë pas votëbesimit nga 17 mijë demokratë e gjeti Bashën në dy mbledhje të njëpasnjëshme. Fillimisht Kolegji i Kryetarëve dhe më pas Kryesia e Partisë, nga ku zyra e shtypit shpërndau disa vendime, raporton Euronews Albania.

Në aspektin parlamentar, Kryesia ka vendosur që Partia Demokratike të depozitojë në Kuvend kërkesën për ngritjen e dy komisioneve, një për fondet e IPARD dhe një tjetër për statusin investitorit strategjik. Mbetet për t’u parë se si do të veprohet për këto kërkesa, në kushtet kur pas zhvillimeve të qershorit dhe korrikut, numri i deputetëve demokratë që mbështesin Bashën nuk është më shumë se 10.

Me dy grupime kundër tashmë, njëri pro Berisha dhe tjetri pro Bardhi, në mbledhjen e Kryesisë mbrëmjen e së dielës u miratua kërkesa e Bashës për të mbledhur Kuvendin Kombëtar më 2 shtator. Në këtë mbledhje të jashtëzakonshme të organit më të lartë vendimmarrës të partisë do të jetë kjo agjendë: Ndryshime statutore; Vendime organizative në përputhje me vendimet statutore; si dhe Miratimi i agjendës politike të Partisë Demokratike.