Zelensky lajmërohet nga aeroplani gjatë udhëtimit për në SHBA: Do t’ua prezantoj planin e fitores së Ukrainës

Presidenti ukrainas Volodymyr Zelensky do t’ia prezantojë atë që ai e quajti “planin e tij për fitore” presidentit amerikan Joe Biden gjatë një vizite në SHBA këtë javë.

Pas takimit me Biden, Zelensky tha se kishte ndërmend t’ia paraqiste Kongresit dhe dy kandidatëve në zgjedhjet amerikane – zëvendëspresidentes Kamala Harris dhe ish-presidentit Donald Trump, transmeton Telegrafi.

Trump ka kritikuar më parë mbështetjen e SHBA për Ukrainën dhe ka folur mirë për presidentin rus Vladimir Putin, por tha se ai “ndoshta” do të takohet me Zelensky.

Vizita e presidentit ukrainas në SHBA – ku ai do të marrë pjesë gjithashtu në Asamblenë e Përgjithshme të OKB-së – përkon me përpjekjet e Shtëpisë së Bardhë për të përgatitur një paketë të re ndihme ushtarake prej 375 milionë dollarësh për Ukrainën.

“Kjo vjeshtë do të përcaktojë të ardhmen e kësaj lufte”, tha Zelensky në një postim në X së bashku me video adresimin e tij të natës, të cilën ai e dha nga aeroplani i tij.

Në një deklaratë përpara vizitës, udhëheqësi ukrainas parashikoi tre elementë të këtij plani fitoreje.

Ai renditi donacione të tjera armësh për ushtrinë, përpjekjet diplomatike për të detyruar Rusinë në paqe dhe për të mbajtur Moskën përgjegjëse për pushtimin në shkallë të plotë të vendit të tij në vitin 2022.

Ukraina ka kërkuar prej muajsh që SHBA-ja, Britania e Madhe dhe aleatët e tjerë perëndimorë të lehtësojnë kufizimet në përdorimin e raketave me rreze të gjatë veprimi, në mënyrë që të mund të godasë objektivat në Rusi, të cilat Kievi thotë se përdoren për të nisur sulme.

Më herët në shtator, Putin paralajmëroi vendet perëndimore se ai do t’i konsideronte sulmet me raketa me rreze të gjatë si “pjesëmarrje të drejtpërdrejtë” të aleancës ushtarake të NATO-s në luftë.

I pyetur nga gazetarët të dielën nëse ai kishte marrë një vendim për të lejuar Ukrainën të përdorte armë me rreze të gjatë të prodhuara nga SHBA, Biden u përgjigj “jo”. /Telegrafi/