Vuçiq para takimit me Kurtin: Do të jetë vështirë

Presidenti i Serbisë, Aleksandar Vuçiq, para takimit të sotëm në Bruksel me kryeministrin e Kosovës, Albin Kurti, ka thënë “se gjaku i derdhur nuk duhet të harrohet”.

Ai në një video të postuar në Instagram, tha: “Prej ditësh, në veçanti dje dhe sot, Albin Kurti po udhëheq një fushatë kundër Serbisë. Ai dhe ndihmësit e tij, përfshirë të gjithë nga Shaip Kamberi e deri te Azem Vllasi, dhe të gjithë politikanët dhe analistët”, tha Vuçiq.

“Do të jetë e vështirë. Kundër nesh janë të gjithë të mëdhenjtë nga Perëndimi. Megjithatë, në anën tonë është drejtësia. Është më e rëndësishme se kjo është se ata nuk e kuptojnë sesa e fuqishme është dashuria për liri dhe sa fort duhet të ruhet, pavarësisht presioneve”, shtoi presidenti serb, transmeton Telegrafi.

Kurti dhe Vuçiq pritet të takohen sonte në Bruksel, ku me theks të veçantë raportohet se do të diskutojnë për Asociacionin e komunave me shumicë serbe.

Ata ishin takuar për herë të fundit në Ohër, më 19 mars, kur edhe janë pajtuar gojarisht për zbatimin e asaj që njihet si Marrëveshje Bazë, e që duhet të çojë drejt normalizimit të marrëdhënieve mes dy vendeve. /Telegrafi/