Bosi turk i kriptovalutave, Faruk Fatih Özer, është gjetur i pajetë në qelinë e tij në një burg të sigurisë së lartë në Turqi, ku dyshohet se është vetëvarur me çarçaf. Sipas mediave turke, trupi i tij është zbuluar nga rojet e burgut gjatë kontrollit të mëngjesit, ndërsa autoritetet kanë izoluar menjëherë zonën dhe kanë nisur procedurat hetimore për të sqaruar rrethanat e ngjarjes.
Prokuroria turke ka urdhëruar zhvillimin e një hetimi të plotë, përfshirë marrjen në pyetje të punonjësve të burgut dhe analizimin e kamerave të sigurisë. Trupi i Özerit është dërguar në Institutin e Mjekësisë Ligjore në Stamboll për autopsi, me qëllim përcaktimin e saktë të shkakut të vdekjes. Ende nuk ka një njoftim zyrtar nëse bëhet fjalë për vetëvrasje apo ndonjë rrethanë tjetër të dyshimtë.
Faruk Fatih Özer ishte arrestuar në Shqipëri më 30 gusht 2022, pas një arratisjeje të bujshme që kishte tronditur Turqinë. Ai ishte shpallur në kërkim ndërkombëtar për mashtrimin e qindra mijëra investitorëve përmes platformës së kriptovalutave Thodex, e cila u shemb papritur në vitin 2021.
Gjatë arratisjes, Özer kishte kaluar ilegalisht kufirin dhe për disa muaj kishte jetuar në Elbasan, ku përpiqej të fshihej me identitet të rremë. Ai u arrestua në një nga plazhet e jugut të vendit, pas një operacioni të përbashkët mes policisë shqiptare dhe autoriteteve turke.
Sipas akuzave të ngritura ndaj tij, Özer kishte mashtruar rreth 400 mijë persona, duke përvetësuar fonde me vlerë mbi 2 miliardë dollarë. Rasti i tij ishte bërë një nga skandalet më të mëdha financiare në historinë e Turqisë, duke tronditur tregun e kriptovalutave dhe duke nxitur autoritetet turke të forcojnë rregulloret mbi tregtinë dixhitale.
Pas ekstradimit në Turqi, Özer ishte dënuar me 11,196 vite burg për mashtrim të organizuar, pastrim parash dhe drejtim të një organizate kriminale. Megjithëse ai e kishte mohuar fajësinë, duke pretenduar se kolapsi i platformës ishte pasojë e sulmeve kibernetike dhe jo mashtrimit, gjykata e shpalli fajtor në të gjitha pikat e akuzës.
Vdekja e tij ka ngjallur shumë pikëpyetje në opinionin publik turk, me disa që kërkojnë hetim të pavarur për të zbardhur nëse bëhet fjalë për vetëvrasje apo për eliminim të qëllimshëm, për shkak të njohurive që ai mund të kishte mbi rrjetin financiar që vepronte përmes Thodex. /Telegrafi/
