Veterani i ushtrisë amerikane bën përparim ‘të pabesueshëm’ pas transplantimit të parë të syrit në botë

Studiuesit thonë se veterani i ushtrisë amerikane i cili iu nënshtruar transplantit të parë të gjithë syrit, ka bërë përparim të rëndësishëm një vit më vonë dhe ka mundur të rifillojë jetën e tij normale.

Aaron James, 46-vjeç, iu nënshtruar gjithashtu një transplanti të rrallë të pjesshëm të fytyrës, transmeton Telegrafi.

Ai kishte humbur pjesën më të madhe të fytyrës së tij në një aksident në vitin 2021 derisa punonte si drejtues i linjës së tensionit të lartë.

Syri i tij dhurues deri më tani ka ruajtur presionin dhe rrjedhjen normale të gjakut dhe ka ruajtur madhësinë e tij, ndryshe nga sytë e dhuruesve te kafshët që shpesh tkurren pas transplanteve, thanë studiuesit në NYU Langone Health në një studim të ri.

James nuk e ka rifituar shikimin në atë sy, por studiuesit shpresojnë se ai mund të jetë në gjendje të shohë përsëri nga ai.

Ata thanë se ishin “me të vërtetë të mahnitur” nga shërimi i James.

“Rezultatet që po shohim pas kësaj procedure janë mjaft të pabesueshme dhe mund të hapin rrugën për protokolle të reja klinike dhe të frymëzojnë kërkime të mëtejshme në transplantet komplekse që përfshijnë organet shqisore kritike”, tha mjeku Vaidehi Dedania, okulist i James.

Autorët e studimit thanë se një test i quajtur elektroretinografi – i cili mat përgjigjen elektrike të retinës ndaj dritës – tregoi se shufrat e syrit të dhuruesit, qelizat nervore të ndjeshme ndaj dritës në sy, i mbijetuan transplantit. /Telegrafi/