Vështirë të rinisë kampionati në Spanjë, futbollistët nuk pranojnë të luajnë

Kampionatet evropiane të futbollin po përgatiten të rikthehen në fund të majit apo në fillim të qershorit.

Futbolli ka gjashtë javë që është ndaluar, derisa disa nga ligat evropiane kanë caktuar edhe datën e rikthimit në fushë.

La Liga ka kërkuar nga klubet që të bëhen gati për tu rikthyer në stërvitje, derisa Komisioni i Sportit ka bërë një protokoll për skuadrat dhe lojtarët.

Por futbollistët nuk e kanë pranuar këtë protokoll dhe ata kanë reaguar nëpërmjet sindikatës së tyre.

Sindikata e Futbollistëve profesionist në Spanjë ka hedhur poshtë protokollin e komisionit të sportit duke aluduar se ai është i paqartë.

Lojtarët kanë kërkuar më shumë siguri për ta, ndërsa në protokoll nuk është cekur fare se çfarë ndodhë nëse ndonjë futbollist preket nga coronavirusi pas rinisjes së kampionatit.

Ky refuzim i futbollistëve nëpërmjet sindikatës së tyre ka bërë që futbolli spanjoll të futet në një kaos total.

Ditë më parë futbollistët refuzuan të qëndronin në karantinë të gjatë me klubet e tyre, pasi sipas tyre nuk duan të qëndrojë gjatë larg familjes.

Gjithsesi mbetet të shihet nëse komisioni i sportit spanjoll do të bëjë një protokoll tjetër, pasi në këtë situatë vështirë për tu rikthyer futbolli në Spanjë. /Telegrafi/