Vendet që deri më tani kanë zgjedhur përfaqësuesit e tyre për në Eurovision 2025

Eurovision është një platformë që shfaq diversitetin kulturor dhe muzikor të Evropës, duke lejuar çdo vend të prezantojë një pjesë të identitetit të tij përmes muzikës.

Kur kanë mbetur edhe pak muaj nga fillimi i këtij kompeticioni, vendet duhet të bëhen gati për të zgjedhur artistët më të denjë për t’i prezantuar në këtë garë.

Deri më tani, vetëm pesë shtete kanë përzgjedhur përfaqësuesit e tyre për garën evropiane muzikore dhe ato janë: Shqipëria, Qipro, Çekia, Mali i Zi dhe Holanda.

Shqipëria do të përfaqësohet në Eurovision nga grupi Shkodra Elektronike, me këngën “Zjerm” pas triumfit në Festivalin e Këngës në RTSH.

Mali i Zi do të përfaqësohet nga artistja Nina Zizic, Qipro ka zgjedhur si përfaqësues të tyre këngëtarin Theo Evan, Çekia përfaqësohet nga ADONXS derisa Holanda ia ka besuar kompeticionin artistit Claude.

Eurovision është një ngjarje muzikore që ka fituar popullaritet dhe ka krijuar tradita të forta që prej fillimit të tij në vitin 1956.

Kjo garë, e cila zhvillohet çdo vit, mbledh së bashku artistë nga shumë shtete të ndryshme, të cilët performojnë këngë origjinale me shpresën për të fituar titullin e prestigjioz “Fituesi i Eurovisionit”.

Festivali është një mundësi e shkëlqyer për të promovuar kulturën dhe talentet muzikore të secilit vend pjesëmarrës dhe ka një ndikim të jashtëzakonshëm në industrinë e muzikës ndërkombëtare.

Këngët që marrin pjesë në këtë garë janë të një gamë të gjerë zhanresh, duke përfshirë pop, rock, balada, këngë folk, dhe madje dhe muzikë elektronike. Kjo shumëllojshmëri i jep mundësinë publikut që të përjetojë një spektër të gjerë stilesh dhe traditash muzikore, ndërsa artistët shpesh i përdorin këto mundësi për të shprehur mesazhe sociale, politike dhe kulturore.

Megjithëse Eurovision është kryesisht një garë muzikore, ajo ka pasur edhe ndikime politike, duke reflektuar shpesh tensionet mes shteteve pjesëmarrëse. Votimi ka qenë një temë diskutimi vit pas viti, me shumë kritika se shpesh herë vendet fqinjë mund të favorizojnë njëri-tjetrin. /Telegrafi/