Vdekshmëria nga COVID-19 në Shqipëri, Meta: Shifrat të analizohen nga Komiteti Teknik i Ekspertëve

Presidenti i Shqipërisë, Ilir Meta i bëri thirrje sot Komitetit Teknik të ekspertëve dhe autoriteteve të analizojnë të dhënat e FMN-së mbi vdekshmërinë nga COVID-19.

Meta në një postim në Facebook shkruan se renditja e Shqipërisë si vendi me vdekshmëri më të lartë në Evropë nga COVID-19 sipas FMN, është një fakt alarmant, që duhet të merret shumë seriozisht.

Lexoni të plotë postimin:

“Renditja e Shqipërisë si vendi me vdekshmëri më të lartë në Evropë nga COVID-19 sipas FMN, është një fakt alarmant, që duhet të merret shumë seriozisht, për më tepër që vendi ynë është ende me moshë mesatare më të re të popullatës krahasuar me vendet e tjera të BE.

I bëj thirrje, Komitetit Teknik të ekspertëve dhe autoriteteve të analizojnë me përgjegjësi këto të dhëna, si të rishihen me përgjegjësi të gjitha protokollet, masat për parandalimin dhe trajtimin e pandemisë, në mënyrë transparente dhe bashkëpunuese me qytetarët.

Duhen zbuluar dhe eliminuar pikat e dobëta dhe duhet ndërhyrë urgjentisht për të parandaluar këtë shkallë të lartë të humbjeve të jetëve.

Jemi ende në valën e pandemisë dhe ndërhyrjet përmirësuese dhe korrigjuese të masave antiCovid duhet të ndërmerren sa më parë”. /Telegrafi/