Vdekja e Kadares, opozita e vlerëson lartë kontributin e tij për vendin dhe kombin

Shkrimtari i njohur Ismail Kadare ka ndërruar jetë mëngjesin e sotëm. Ai vdiq në moshën 88-vjeçare.

Për vdekjen e Kadares ka pasur reagime të shumta, ku edhe u vlerësua lartë kontributi i tij për vendin dhe kombin, transmeton Telegrafi.

Në mesin e shumë reagimeve, një telegram ngushëllimi e ka bërë edhe kryetari i LDK-së, Lumir Abdxhiku.

Ai ka shkruar se sot bota shqiptare u zgjua në zi.

“Sot bota shqiptare u zgjua në zi. U nda nga jeta Ismail Kadare, shkrimtari i përmasave ndërkombëtare, ai i cili për shumë dekada i dha letërsisë shqipe dhe asaj botërore kryevepra, që do mbesin gjithmonë referenca për kulturën dhe letërsinë, si vlera universale që kapërcejnë kufijtë nacional. Kolosi Ismail Kadare, përmes veprave të tij, i ka dhënë nder e dinjitet të përbotshëm artit, kulturës dhe gjuhës shqipe”, thuhet në telegramin e ngushëllimit të Abdixhikut.

Tutje, ai ka shkruar se Kadare “ka paraqitur tablon e errët nëpër të cilën ka kaluar Shqipëria komuniste, vuajtjet, sakrificat, por edhe vlerat e mirëfillta shqiptare. Ai përmes mijëra faqeve të shkruara ka promovuar traditën dhe kulturën shqiptare në botë, duke i dhënë një vlerë të shtuar jo vetëm letërsisë shqipe, por edhe mbarë kontinentit dhe më gjerë”.

Për vdekjen e Kadares, ka shkruar edhe kryetari i PDK-së, Memli Krasniqi.

Krasniqi thotë se Kadare ishte gjigant i letrave shqipe.

“Gjatë jetës, ndonjëherë mendojmë se disa nga personalitetet të cilat na kanë frymëzuar dhe që me veprimtarinë e tyre jemi rritur e formësuar – do t’i kemi pranë përgjithmonë. Megjithatë, ja që vdekja është e pamëshirshme dhe troket në derën e secilit – edhe të gjigantëve. Ismail Kadare, me një stil krejt të veçantë dhe origjinal, ishte një gjigant i letrave shqipe. Një personalitet dhe një zë i cili përgjatë jetës së tij i bëri jehonë thellësive të historisë, kulturës dhe vetë shpirtit tonë njerëzor”, thotë ai.

Tutje, ai ka pohuar se Kadareja, mendja brilante pas veprave të përjetshme si “Kronikë në gur”, “Gjenerali i ushtrisë së vdekur”, “Prilli i thyer” dhe dhjetëra veprave të tjera, ka lënë gjurmë të pashlyeshme në të gjithë botën letrare.

“Shkronjat dhe fjalët e tij thurën mozaikun e ndërlikuar të shqiptarëve, duke sjellë në jetë betejat tona, triumfet tona dhe shpirtin tonë të palëkundur”, ka pohuar ai.

Kurse, kreu i AAK-së, Ramush Haradinaj thotë se nuk ka emër më të madh ndër shqiptarë, se sa emri Ismail Kadare.

“Jo vetëm se ai mbetet emblema e letërsisë, e krijimtarisë dhe e krenarisë shqiptare, por sepse ishte shqiptari më i famshëm në Glob. Njeriu që e lartësoi Kombin, që e lartësoi Shqipërinë, që lartësoi Kosovën dhe që letërsinë e një kombi të vogël e futi në analet e letërsisë së përbotshme. Ne sot e kemi humbur gjeneralin e letrave shqipe, e kemi humbur ambasadorin e krijimtarisë shqiptare në Botë, e kemi humbur Ismail Kadarenë, emri i të cilit i ngërthen në vete krejt vlerat më të larta që mund t’i ketë njeriu”, ka pohuar kreu i AAK-së.

Tutje, ai ka shtuar se “ky emër do t’i jetojë epokat! Lamtumirë Mjeshtër”.

Shkrimtari më i madh shqiptar, Ismail Kadare, mbylli sytë përgjithmonë në orët e para të mëngjesit të sotëm.

Ismail Kadare është shkrimtar, personaliteti qendror i kulturës shqiptare në gjysmën e dytë të shek. XX, protagonist i zhvillimeve më të përparuara në letërsinë shqipe gjatë kësaj periudhe. /Telegrafi/