Ushtaraku britanik Wilkes: Ka ende njerëz që duan të sfidojnë punën e KFOR-it dhe Policisë së Kosovës – jemi të gatshëm të përballemi me çdo kërcënim

Komandanti britanik i Regjimentin Mbretëror të Princeshës së Uellsit në KFOR, Charlie Wilkes, në një intervistë për Telegrafin ka folur për situatën e sigurisë në vend, konkretisht në pjesën veriore.

Wilkes në këtë intervistë shprehet se “aktualisht ende ka njerëz që do të kërkonin të sfidojnë punën që e ka bërë Policia e Kosovës dhe KFOR-i”.

Duke folur për tensionet e fundit në veri, oficeri britanik shprehet se mbeten të përkushtuar për ruajtën e një mjedisi të sigurt për të gjithë njerëzit në Kosovë.

“Ajo që kemi mësuar nga tensionet e fundit është se edhe pse ka akterë që do të kërkonin të kërcënojnë mjedisin e sigurt, ne jemi të pajisur mirë për t’u përballur me çdo kërcënim nëse shfaqet, në përputhje me mandatin e KFOR-it në OKB”, ka deklaruar Wilkes.

Lexo po ashtu Arrijnë në Kosovë 200 trupa britanike dhe 130 rumune, shtohet prania e KFOR-it në veri dhe kufirin me Serbinë

Vlen të theksohet se pas tensioneve të fundit në veri, Britania e Madhe ka dërfuar një kontingjent prej 200 ushtarësh britanikë nga Batalioni i Parë i Regjimentit Mbretëror të Princeshës së Uellsit.

KFOR-i aktualisht përbëhet nga mbi 4.500 trupa të kontribuar nga 27 aleatë dhe partnerë të NATO-s.

Intervista e plotë:

Ju keni ardhur në Kosovë për të ndihmuar në paqe dhe siguri. Si është të jesh pjesë e RC-E të KFOR-it dhe të shërbesh në vendin tonë?

Wilkes: Të qenit pjesë e Komandës Rajonale Lindje është një shans i madh për të punuar së bashku me aleatët e tjerë të NATO-s dhe partnerët e tjerë kombëtarë për të rritur mirëkuptimin dhe aftësitë tona së bashku. Ne gjithmonë mund të mësojmë mësime të reja si organizatë dhe sigurisht që e kemi bërë këtë duke qenë kaq afër me kaq shumë ushtarë të tjerë në të gjitha gradat dhe nivelet.

Sa kohë keni që jeni pjesë e KFOR-it dhe kur keni ardhur në Kosovë?

Wilkes: Unë kam qenë pjesë e KFOR-it që kur arritëm në Kosovë në gusht të këtij viti para aktivizimit të Forcës Rezervë Strategjike.

Cilat janë sfidat kryesore me të cilat jeni përballur në sigurimin e paqes për të gjithë qytetarët e Kosovës?

Wilkes: Në disa nga zonat më rurale, terreni ka qenë mjaft sfidues. Ndryshimet e motit, kodrat dhe malet e pjerrëta e kanë bërë të vështirë të shkosh në disa nga zonat tona më të largëta të operimit. Megjithatë ne jemi mësuar të lëvizim në këmbë në këtë lloj terreni dhe kjo është pikërisht ajo për të cilën ne stërvitemi.

Si e shihni situatën aktuale të sigurisë në Kosovë, konkretisht në pjesën veriore?

Wilkes: Aktualisht ka ende njerëz që do të kërkonin të sfidojnë punën që ka bërë Policia e Kosovës dhe KFOR-i. Zonat e popullsisë në të cilat kemi kaluar kohë të konsiderueshme brenda dhe përreth gjatë pothuajse 100 ditëve të aktivitetit të vazhdueshëm, na kanë treguar se një incident nuk llogarit situatën e sigurisë së një zone të tërë, dhe ne mbetemi të përkushtuar për ruajtjen e një mjedisi të sigurt për të gjithë njerëzit në Kosovë.

A keni pasur ndonjë moment kur keni ndihmuar në menaxhimin e konflikteve lokale dhe çfarë keni mësuar nga kjo përvojë?

Wilkes: Personalisht nuk kam pasur, megjithatë kam pasur mundësinë të angazhohem me njerëzit vendas pas periudhave të tensioneve të rritura, gjë që më ka mësuar shumë për rëndësinë e operacioneve paqeruajtëse.

Ajo që kemi mësuar nga tensionet e fundit është se edhe pse ka akterë që do të kërkonin të kërcënojnë mjedisin e sigurt, ne jemi më se të pajisur mirë për t’u përballur me çdo kërcënim nëse shfaqet, në përputhje me mandatin e KFOR-it në OKB.

Cili është mesazhi juaj për të gjithë qytetarët e Kosovës, shumë prej të cilëve ndjehen të frikësuar pas ngjarjeve të fundit në veri?

Wilkes: Vazhdoni të jeni të gëzuar dhe krenarë. Kosova është një vend i bukur dhe ne jemi mirënjohës për mundësinë për të ndihmuar përpjekjet e NATO-s. Ne do të vazhdojmë të punojmë shumë së bashku me partnerët tanë ndërkombëtarë për të siguruar një mjedis të sigurt në mënyrë të paanshme për të gjithë njerëzit në Kosovë. /Telegrafi/