UNICEF bën thirrje për solidaritet që shkollat në Maqedoni ​​të mbeten të sigurta dhe të hapura

UNICEF-i inkurajohet nga rekomandimi i Komisionit për Sëmundje Infektive që nga 1 shkurti të hapen shkolla me prezencë fizike dhe bën thirrje për solidaritet kombëtar për vazhdimin e sigurt të arsimit me prezencë fizike gjatë gjithë vitit shkollor. Ai beson se çdo mbyllje e zgjatur e shkollave në nivel shtetëror do të thellojë më tej mësimin e munguar dhe do të vazhdojë të ndikojë negativisht në mirëqenien emocionale të fëmijëve.

“Vendimi për hapjen e shkollave për mësim me prezencë është vendim i Qeverisë. Jemi të vetëdijshëm se ky vendim po shqyrtohet në kuadër të situatës epidemiologjike me KOVID-19 dhe të kuptuarit në rritje të rreziqeve. Por, gjithashtu duhet të merret parasysh ndikimi i mbylljes së zgjatur të shkollave në mësimin dhe mirëqenien e fëmijëve, tha Patricia Di Xhovani, përfaqësuese e UNICEF-it.

Ajo theksoi se shkollat ​​janë një shërbim publik bazë, një vend për mësimin akademik thelbësor për të ndihmuar fëmijët të zhvillojnë potencialin e tyre.

“Mbyllja e shkollave për mësim fizik për shkak të rritjes së transmetimit të KOVID-19 në komunitet nuk duhet të jetë reagimi i parë, por duhet të vijë pasi të jenë shfrytëzuar të gjitha alternativat e tjera”, tha ajo.

Theksoi se mësimi në distancë është një masë alternative që duhet të zbatohet vetëm si masë përfundimtare.

“Përveç kësaj, edhe krahas që teknologjitë onllajn dhe ato digjitale e përmirësojnë përvojën e të mësuarit, në terma afatgjatë ato nuk mund të zëvendësojnë metodat e përdorura nga mësuesi gjatë mësimdhënies së drejtpërdrejtë dhe as nuk mund të zëvendësojnë shoqërimin e bashkëmoshatarëve. Hulumtimet me drejtorët, mësuesit dhe prindërit tregojnë se mësimi në distancë ka ndihmuar në ruajtjen e procesit të të mësuarit tek fëmijët, megjithatë më shumë se gjysma e mësuesve kanë parë një rritje të numrit të fëmijëve që përpiqen të adoptojnë ose nuk arrijnë të adoptojnë atë që u është mësuar”; tha Di Xhovani.

Përveç humbjeve në mësim, shtoi, mbyllja e shkollave pati një ndikim negativ në shëndetin mendor të fëmijëve dhe rriti rrezikun e dhunës. Duke aplikuar masa parandaluese, shkollat ​​kanë dëshmuar se janë një vend i sigurt për fëmijët dhe nuk janë një shtytës kryesor i përhapjes së infeksionit në komunitet.

“Po i afrohemi fundit të vitit të dytë të pandemisë. Në ato dy vite, ndërprerjet në arsim zgjatën më shumë krahasuar me kufizimet e vendosura në sektorë të tjerë në vend. UNICEF bën thirrje për solidaritet kombëtar me fëmijët për shkolla të hapura dhe të sigurta. Qeverisja qendrore dhe vendore duhet të forcojnë mbështetjen për shkollat ​​me burimet e nevojshme për të zbatuar masat e provuara parandaluese, për të kompensuar mësimin e munguar dhe për të prezantuar programe të reja për të mbështetur shëndetin mendor dhe mirëqenien e fëmijëve,” tha Di Xhovani.

UNICEF, tha ai, i bëri thirrje opinionit që të bëjë pjesën e tij në parandalimin e përhapjes së virusit në komunitet.

“Të gjithë duhet të jemi më të ndërgjegjshëm dhe më të disiplinuar në ndjekjen e masave parandaluese në mënyrë që KOVID19 të qëndrojë jashtë shkollave. Duhet të vazhdojmë të sillemi me përgjegjësi, të mbajmë maskë, të praktikojmë higjienën e duarve, të mbajmë distancë fizike, të vaksinohemi kundër KOVID-19 nëse plotësojmë kërkesat e vaksinimit dhe të testohemi dhe të izolohemi nëse kemi simptoma”, tha Di Xhovani dhe theksoi se viti 2022 duhet të jetë një vit në të cilin interesat më të mira të fëmijëve dhe arsimi do të jenë prioritet kombëtar dhe do të kenë përparësi.