Ukrainasit thonë se trupat e Koresë së Veriut pësuan humbje të mëdha në Kursk, duhej të dërgoheshin tjerë për ta plotësuar boshllëkun

Inteligjenca ushtarake ukrainase raportoi përmes Telegramit se njësitë e ushtrisë së Koresë së Veriut duhej të plotësoheshin, pasi pësuan humbje të konsiderueshme gjatë sulmeve në rajonin e Kurskut.

“Gjatë 14 dhe 15 dhjetorit 2024, në zonat e fshatrave Plekhovo, Vorozhba dhe Martynovka, në rajonin Kursk të Rusisë, njësitë e ushtrisë së Koresë së Veriut pësuan humbje të konsiderueshme – të paktën 30 ushtarë u vranë ose u plagosën”, thuhet në raportin e ditës së sotme, transmeton Telegrafi.

Sipas vlerësimeve të inteligjencës ukrainase, të paktën tre ushtarakë të Koresë së Veriut u zhdukën pranë fshatit Kurilovka.

Për shkak të këtyre humbjeve, ishte e nevojshme të përforcoheshin grupet me personel të ri nga Brigada e 94-të e ushtrisë së Koresë së Veriut për të mbështetur operacionet luftarake në rajonin e Kurskut.

Të dielën, më 15 dhjetor, ushtria ukrainase publikoi një video që supozohet se tregon trupat e ushtarëve të parë të Koresë së Veriut të vrarë në luftën kundër Ukrainës.

Robert “Madyar” Brovdi, komandanti i njësisë “Zogjtë e Madyar” të Ukrainës – ndau në Telegram një video të filmuar me dron.

Pamjet treguan një grumbull trupash, që thuhet se ishin të ushtarëve të Koresë së Veriut që luftonin përkrah Rusisë në rajonin e Kurskut. /Telegrafi/