Luftëtari spanjoll me origjinë gjeorgjiane, Ilia Topuria, është shpallur kampioni i ri i peshave të lehta në UFC pas një nokauti spektakolar në raundin e parë ndaj Charles Oliveira.
Ish-kampioni Oliveira nuk pati asnjë mundësi përballë “El Matador”, i cili konfirmoi edhe një herë se është një nga figurat më të frikshme në artet marciale mikse. Për Topurian, kjo ishte fitorja e 17-të në po aq ndeshje profesionale – një rekord perfekt.
Nata e UFC 317 solli disa përballje të shkëlqyera, por nokauti i Topurias ishte padyshim momenti kulmor dhe surpriza më e madhe e mbrëmjes.
Pas largimit të Islam Makhachev nga kjo kategori, titulli i peshave të lehta kishte mbetur vakant. Topuria vendosi të ngjitej nga kategoria e mëparshme dhe t’i sfidonte më të mirët, një vendim që rezultoi i duhur.
Fitorja u arrit falë një kombinimi preciz goditjesh, dy të drejta të fuqishme dhe një grusht të majtë që rrëzoi Oliveirën në tokë. Edhe pse Topuria goditi edhe dy herë të tjera përpara ndërhyrjes së gjyqtarit, ndeshja ishte vendosur.
Me këtë triumf, 28-vjeçari po konsolidohet si një nga superyllët e rinj të UFC-së. Ai tashmë ka fituar tituj në dy kategori të ndryshme peshe, dhe me një të ardhme të gjatë përpara, ai synon dominimin afatgjatë në sport.
Topuria e ka bërë të qartë: objektivi i tij është madhështia, dhe me formën aktuale, duket se kufiri i vetëm për të është qielli. /Telegrafi/
