UEFA publikon 28 futbollistët më të mirë të Kosovës në kualifikimet për Euro 2020 – këta ishin pesë më të dalluarit

Kosova ka përmbyllur ciklin e parë të kualifikimeve për Kampionatin Evropian, Euro 2020.

Dardanët kanë zënë pozitën e tretë në Grupin A duke marrë 11 pikë pas tetë ndeshjeve.

E shtëpia më e madhe e futbollit evropian, UEFA ka bërë një ranglistë të lojtarëve më të vlerësuar që kanë luajtur në këto kualifikuese.

Vedat Muriqi shihet si lojtari më i vlerësuar te Kosova dhe zë pozitën e 141-të në përgjithësi në Evropë.

Ndërkohë pas tij vjen Valon Berisha, Arijanet Muric dhe dyshja e mbrojtjes Fidan Aliti dhe Amir Rrahmani.

Në pozitën e gjashtë është Milot Rashica, që për dallim me Werder Bremenin, tek Kosova nuk ka mundur ta shfaqë gjithë potencialin e tij.

Besar Halimi, Benjamin Kololli, Arber Zeneli, Mërgim Vojvoda dhe Bersant Celina e mbyllin 11shen më të vlerësuar të Kosovës nga UEFA.

Kujtojmë që Dardanët kanë edhe një mundësi tjetër për tu kualifikuar në Euro 2020, atë përmes Play-Offit në Ligën e Kombeve.

Kosova do të luaj ndaj Maqedonisë në gjysmëfinalen e Divizionit D, ndërsa në rast fitore në finale do ta priste njërën nga dueli Gjeorgji – Bjellorusi. /Telegrafi/