U tha se është pezulluar greva në të gjitha gjykatat dhe prokuroritë, por Prokuroria e Prishtinës vazhdon grevën

Këshilli Gjyqësor i Kosovës (KGJK), dje përmes një njoftimi për media bëri të ditur se është pezulluar greva e punonjësve të administratës në të gjitha gjykatat dhe prokuroritë e vendit.

“Këshilli Gjyqësor i Kosovës (KGJK) njofton se pas takimit të mbajtur sot së bashku me Këshillin Prokurorial të Kosovës (KPK) dhe Sindikatën e Pavarur të Juridikaturës, janë dakorduar që greva të pezullohet në të gjitha gjykatat dhe prokuroritë e vendit”, thuhej në njoftimin e KGjK-së.

Por pavarësisht këtij njoftimi, Prokuroria Themelore e Prishtinës vazhdon të mbetet në grevë.

Telegrafi ka mësuar nga burime brenda kësaj prokurorie se greva e punëtorëve të administratës është duke vazhduar dhe se e njëjta nuk është pezulluar.

Lexo po ashtu Pezullohet greva e punonjësve të administratës në të gjitha gjykatat dhe prokuroritë e vendit

Për dallim nga Prokuroria Themelore e Prishtinës, grevën e kanë pezulluar të gjitha prokuroritë e tjera.

Telegrafi ka kontaktuar me zyrën për media në Prokurorinë Themelore të Gjakovës, Prizrenit, Mitrovicës, Ferizajt, dhe të njëjtit kanë konfirmuar se i janë kthyer punës.

Prej datës 1 mars punëtorët e Prokurorisë Themelore në Prishtinë janë në grevë duke kërkuar realizimin e kërkesave të tyre.

Kërkesat punëtorëve grevistë janë: Aprovimin e Ligjit për punëtorët e administratave të gjykatave dhe prokurorive, përafrimin e pagave të punëtorëve të administratës në raport me pagat e gjyqtarëve dhe prokurorëve, pagesa lineare nga 150 euro për çdo punëtor, shujta ditore prej 3 euro si dhe pagesa e udhëtimit prej 3 euro. /Telegrafi/