U qëllua me snajper nga Mali i Krastës, SPAK: Atentatin ndaj Ardian Çapjas e porositi Suel Çela

Ditën e sotme, Prokuroria e Posaçme SPAK në njoftimin e tij për goditjen e organizatës kriminale të drejtuar nga Suel Çela me bazë në Elbasan, ka zbuluar detaje lidhur me një ngjarje të ndodhur në qershor 2020, ku mbeti i plagosur Ardian Çapja, një drejtues i një grupi tjetër kriminal.

Tentativa për vrasjen e Ardian Çapjas u bë me snajper në datën 08.06.2020 në qytetin e Elbasanit dhe u porosit nga Suel Çela.

Suel Çela është një drejtues i një organizate të madhe të trafikimit të kokainës nga Amerika Latine në Europë, ndaj të cilës SPAK firmosi 19 urdhër arreste dhe dy masa ‘detyrim paraqitje’.

55-vjeçari u qëllua nga mali i Krastës. Çapja sapo kishte dalë nga banesa në afërsi të hotelit në pronësi të tij, ndërsa plumbi e kapi në shpatull. Nga goditja ai u rrezua dhe pësoi dëmtime të tjera në koke.

Atentati i ndodhur në orën 9 të mëngjesit të së hënës alarmoi të gjithë zonën e cila kontrollohet nga fisi Çapja. Një pjesë e tyre bllokuan rrugën kryesore në dalje të Krastës ndërsa aty mësohet se me shpejtësi kaloi dhe mjeti i atentatorëve. Ndonëse iu vunë pas, atentatorët mundën të largoheshin dhe me ndihmën e personave të tjerë të cilët dyshohet se kanë qëlluar në afërsi të lagjes së re.

Ardian Çapja u dërgua fillimisht në spitalin e Elbasanit por më pas u transportua në Tiranë te “Trauma”.

Sipas Policisë, Çapja është i dyshuar për një sërë vrasjesh me pagesë, por dhe i ka shpëtuar disa atentateve në qytetin e Elbasanit, i fundit me tritol poshtë automjetit. Makina e atentatorëve u gjet në zonën e Fushë Mbretit, duke u djegur ndërsa gjatë shuarjes së flakëve një zjarrfikës mbeti i plagosur pasi shpërthyen plumbat të cilat ndodheshin në makinë. /Telegrafi/