U ndalua nga policia për vozitje nën ndikim të alkoolit, burri nga Belgjika lirohet nga akuzat – mjekët konstatuan se trupi i tij prodhon alkool

Një burrë nga Belgjika është liruar nga akuzat e vozitjes nën ndikim të alkoolit, pasi mjekët konfirmuan se ai kishte një gjendje jashtëzakonisht të rrallë që shkaktonte trupin e tij të prodhonte sasi të mëdha alkooli.

40-vjeçari u zbulua se kishte sindromën e auto-birrarisë (ABS) – një gjendje ku prodhohen nivele dehëse të etanolit në zorrë, transmeton Telegrafi.

Ata me këtë gjendje mund të kenë simptoma identike me të dehurit, duke përfshirë të folurit e paqartë, pengimin, humbjen e funksioneve motorike, marramendje dhe gulçim.

Burri, i cili gjithashtu punonte në një fabrikë birre në atë që avokati i tij e përshkroi si “një rastësi tjetër fatkeqe”, u dënua për herë të parë për vozitje nën ndikim të alkoolit në vitin 2019.

Në atë kohë, ai nuk ishte në dijeni të gjendjes së tij. Megjithatë, sipas mediave të atjeshme, ai ishte i hutuar sepse nuk kishte pirë.

U ndalë nga policia përsëri në prill 2022, dhe më pas një muaj më vonë u zbulua se të dyja herët ishin mbi kufirin e lejuar të vozitjes pas konsumimit të alkoolit.

Sipas raportimeve, ndalesa e parë u bë rreth orës 16:00 dhe burri i tha policisë se kishte konsumuar vetëm dy birra një ditë më parë.

Burri më pas u ekzaminua nga dy mjekë, të cilët në mënyrë të pavarur konfirmuan se ai vuan nga ABS. /Telegrafi/