Një person mbajti peng gruan brenda QKUK-së – policia, zjarrfikësit dhe QKUK japin detaje të rastit

Një grua në orët e hershme të mëngjesit është mbajtur peng nga një person në Qendrën Klinike Universitare të Kosovës (QKUK).

Lidhur me këtë Telegrafi ka kontaktuar Qendrën Klinike Universitare të Kosovës.

“Qendra Klinike Universitare e Kosovës në orët e hershme të mëngjesit është njoftuar për një incident brenda hapësirave të klinikave. Menjëherë janë ndërmarrë masat emergjente nga institucioni, është njoftuar edhe Policia e Kosovës. Pas masave të ndërmarra rasti është izoluar dhe nuk paraqet rrezik”, thuhet në njoftimin e QKUK-së.

Edhe nga Policia e Kosovës kanë bërë të ditur se rreth orës 06:30, një grua ka kërkuar ndihmë nga policia pasi që është ndier e frikësuar nga bashkëshorti i saj, i cili i ka shkuar në vendin e punës dhe ia ka kufizuar lëvizjen.

Sipas zëdhënësit të Policisë së Kosovës për rajonin e Prishtinës, Agron Borovci, policia ka dalë në vendin e ngjarjes, ka ndërmarrë të gjitha veprimet e nevojshme për sigurinë e ankueses, ndërkaq ka neutralizuar veprimet e të dyshuarit.

“Aktualisht policia po trajton rrethanat e raportuara që ndërlidhen me rastin, përderisa të dyshuarin e ka shoqëruar në stacioni policor si pjesë e vijimësisë hetimore”, ka thënë Borovci.

Ndërsa, komandanti i batalianit të zjarrëfikësve, Muhamet Reqani për Telegrafin ka thënë se në lidhje me këtë rast ju kanë asistuar Policisë pasi një person kishte tentuar të hidhej nga kati i 6-të i Klinikës së Internos duke e bërë të mundur qasjen nga dritarja dhe nga dera.

“Sot në ora 07:40 BPZ është lajmëruar për një rast se një person në Klinikën e Internos është duke tentuar që të hidhet nga kati 6. Ne si BPZ ju kemi asistuar Policisë së Kosovës me pajisje dhe resurset tona duke e bërë të mundur qasjen nga dritarja dhe dera”, ka thënë Reqani. /Telegrafi/