Tom Sizemore ndërron jetë në moshën 61-vjeçare pas aneurizmës së trurit

Tom Sizemore vdiq të premten (3 mars) në moshën 61-vjeçare pasi pësoi një aneurizëm në tru.

Familja e aktorit mori vendimin e vështirë për ta hequr atë nga ‘mbështetja’ teksa ishte në koma, tha përfaqësuesi i tij, Charles Lago, për Page Six.

“Me pikëllim të madh më duhet të njoftoj se aktori Thomas Edward Sizemore (Tom Sizemore) në moshën 61-vjeçare ndërroi jetë i qetë në gjumë sot në Spitalin St Joseph’s Burbank”, tha ai.

Vëllai i tij, Paul, dhe djemtë e tij binjakë 17-vjeçarë, Jayden dhe Jagger, ishin pranë tij në momentet e fundit.

Ylli i “Saving Private Ryan” ishte shtruar në spital në gjendje kritike që kur u gjet pa ndjenja në shtëpinë e tij në Los Angeles më 18 shkurt.

Të nesërmen, Lago konfirmoi për Page Six se aktori ishte “në kujdes intensiv” dhe po luftonte për jetën e tij.

Më pak se dy javë më vonë, mjekët ndanë lajme tronditëse me të dashurit e Sizemore, duke thënë se nuk kishte “asnjë shpresë” që ai të shërohej.

“Tom ka mbetur në gjendje kritike, në koma, në kujdes intensiv. Mjekët informuan familjen e tij se nuk kishte më shpresë dhe rekomanduan vendimin për t’i dhënë fund jetës”, kishte deklaruar përfaqësuesi i tij.

Ylli i filmit, i njohur gjithashtu për rolet e tij në “Twin Peaks”, “Heat” dhe “True Romance”, kaloi pjesën më të madhe të kohës në sytë e publikut duke luftuar abuzimin me drogën, madje duke u shfaqur në “Celebrity Rehab with Dr. Drew” në 2010.

Sizemore foli për vështirësitë e tij në një intervistë të vitit 2017, duke thënë për Daily Mail se ai ishte “detyruar të rrinte për dy vjet” në një ndërtesë “pa energji elektrike apo ujë të rrjedhshëm”.

“Jeta ime është bërë shumë më e mirë, ka qenë një kronikë e vërtetë, por unë kam një histori të gjatë abuzimi me substancat. Isha në një vend vërtet të keq”, tha ai në atë kohë.

Sizemore gjithashtu pati disa përplasje me ligjin pas një sërë akuzash për dhunë në familje dhe drogë.

Lexo po ashtu Aktori Tom Sizemore në gjendje kritike pasi pësoi aneurizëm në tru

Një nga dënimet për të erdhi në vitin 2003 kur ai u shpall fajtor për abuzim me të dashurën e atëhershme Heidi Fleiss. Ai u dënua me gjashtë muaj burg.

Për më tepër, Sizemore u arrestua në 2019 dhe 2020 për drejtim mjeti nën ndikimin dhe posedimin e një substance të kontrolluar.

Ai la pas dy djemtë e tij, Jagger dhe Jayden, të cilët i ka me ish të dashurën Janelle McIntire. /Telegrafi/