“Ti barabartë unë”, kauza që mblodhi yjet shqiptarë për një qëllim – vetëdijësimin për t’u qëndruar pranë personave me nevoja të veçanta

Për nder të 3 dhjetorit – ditës ndërkombëtare të personave me nevoja të veçanta do të lansohet një klip nëpër rrjetet sociale ku do të marrin pjesë personazhe publike nga profesione të ndryshme të cilët do të jenë të shoqëruar me persona me nevoja të veçanta.

Shemsedin Sajhadi, organizator i projektit “Ti Barabartë Unë” thekson se qëllimi kryesor me realizimin e kësaj kampanje sensibilizuese është ngritja e vetëdijësimit të shoqërisë si dhe socializimi  i personave me nevoja të veçanta me personazhe publike duke pasur rastin që të kalojnë çaste të këndshme gjatë xhirimeve.

“Xhirimet kanë përfunduar, dhe çështja se çka do të përmbajë videoklipi mbetet surprizë për publikun. Megjithatë, jemi të lumtur që bashkërisht kemi arritur të realizojmë një kampanjë të tillë me qëllime sensibilizuese. Urojmë që t’ia arrijmë qëllimit që duam”, tha Shemsedin Sajhadi, organizator i iniciativës për Telegrafin.

Këngëtarja Kida, aktorja Adriana Matoshi, Ish-miss Kosova – Agnesa Vuthaj, aktori – Vedat Bajrami nga Stupcat, moderatori nga Rtv 21 – Visar Kalludra, fitues i Big Brother Albania – Vesel Kurtishaj, moderatori nga Klan Kosova – Enur Pakashtica, fitues i The Voice of Albania – Florent Abrashi, moderatori nga KTV – Amir Mjeku, Dj PM, këngëtarët Morena Taraku dhe Blero Muharremi, janë yjet që iu bashkuan kësaj iniciative.

Një artist pjesëmarrës i cili ende nuk është publikuar po ashtu mbetet një surprizë për publikun.

Xhirimet kanë zgjatur afër një muaj dhe janë realizuar pjesë-pjesë. Artistët dhe personat më nevoja të veçanta janë ndarë aq të kënaqur sa që presin me padurim realizimin e projekteve të tjera, kështu duke ndikuar më tepër për ngritjen e vetëdijësimit të shoqërisë për këtë kategori shoqërie. /Telegrafi/