Thaqi: Këtu treguam karakter, duam të arrijmë më shumë se sa pjesëmarrja në grupe

Armend Thaqi ka bërë një tjetër ndeshje të madhe në Evropë me skuadrën e tij Ballkanin.

Në mungesë të kapitenit Edvin Kuc, shiriti ishte në krahun e Thaqit i cili ka qenë një lider për skuadrën e tij.

Anësori ka shënuar një gol fantastik dhe ka asistuar te ai i Meriton Korenicës në fitoren e madhe të Ballkanit 3-4 në udhëtim te Sivasspor.

Pas ndeshjes Thaqi tha se treguan karakter duke rikthyer rezultatin dhe duke fituar ndeshjen.

“Ndeshjen e nisëm keq. Ta fillosh 0:1 sidomos si mysafir është shumë e vështirë. Këtu u tregua karakteri i ekipit, ku u rikthyem në lojë. Ne e kthyem në lojë Sivassporin”.

“Ia falëm dy gola dhe e rikthyem në lojë, por zoti na ndihmoi që ta fitojmë ndeshjen”, tha Thaqi.

Tutje Thaqi ka thënë se shpresojnë që të bëjnë gjëra edhe më të mëdha se sa të luajnë vetëm ndeshjet e fazës së grupeve.

“Kjo ndeshje na ka hapë rrugë që të arrijmë edhe më shumë se sa pjesëmarrja në fazën e grupeve. Shpresojmë që në ndeshjen e kthimit të shënojmë fitore dhe ti gëzojmë të gjithë tifozët”, deklaroi Thaqi pas ndeshjes. /Telegrafi/