Thaçi dhe Anderson flasin menaxhimin e burgjeve gjatë pandemisë COVID-19

Drejtori i Përgjithshëm i Shërbimit Korrektues të Kosovës, Nehat Thaçi, priti në takim drejtorin e Departamentit për Siguri Publike në OSBE, Edward Anderson, me të cilin diskutuan lidhur me sigurinë në institucione korrektuese dhe menaxhimin e masave mbrojtëse ndaj Pandemisë COVID-19.

Gjatë takimit, Thaçi e njoftoi Anderson rreth menaxhimit dhe zbatimit të planit operativ “Coronavirus”, i cili ka për qëllim parandalimin e përhapjes së pandemisë COVID-19 në institucione korrektuese dhe ato të paraburgimit, ku si rezultat i këtij plani, asnjë i burgosur nuk është i prekur nga pandemia.

“Deri sot kemi bërë menaxhim të mirë, por ky fakt nuk duhet të na shpërqendrojë, andaj vëmendja jonë do të vazhdojë të jetë e lartë për aq kohë sa virusi është në mesin tonë”, tha Thaçi.

E në anën tjetër, Anderson theksoi se SHKK me planin operativ “Coronavirus”  ka bërë një punë të shkëlqyer në menaxhimin e situatës dhe të parandalimit të përhapjes së infektimit në institucionet korrektuese dhe ato të paraburgimit.

Gjatë takimit, Anderson tha se  OSBE do të vazhdojë ta mbështesë SHKK-në në të ardhmen, sidomos në fushën e trajnimeve, hartimin e rregulloreve dhe të Ligjit për Shërbimin Korrektues të Kosovës. /Telegrafi/