Tentuan të fusnin barna kontrabandë në Shqipëri, arrestohen pesë shtetas nga Kosova

Pesë shtetas kosovarë janë arrestuar në earoportin e Rinasit në Tiranë, pasi tentuan të fusnin në vendin tonë 400 kg barna kontrabandë.

Nga verifikimet e kryera dyshohet se 5 të arrestuarit do të futnin në Shqipëri dhe më pas në Kosovë, barna të blera në Jordani.

Gjatë kontrollit të policisë u sekuestruan 1,057,840 tableta (barna) të dyshuara të kontrabanduara (me peshë 417.1 kg), 300,000 euro të cilat njëri prej të arrestuarve nuk i kishte deklaruar në PKK Rinas, si dhe 6 celularë.

Njoftimi i policisë:

Shërbimet e Sektorit për Hetimin e Krimeve Ekonomike dhe Financiare, pas informacioneve të siguruara nga inteligjenca policore, se në aeroportin e Rinasit, në hyrje të RSh-së, do të paraqiteshin disa shtetas të cilët në bagazhet e tyre dispononin mallra kontrabandë, menjëherë kanë organizuar punën dhe në bashkëpunim me Drejtorinë e Hetimit Doganor në Departamentin Operativo-Hetimor në Drejtorinë e Përgjithshme të Doganave dhe Komisariatin e Policisë Kufitare Rinas, kanë finalizuar operacionin policor të koduar “Transit”.

Gjatë operacionit janë arrestuar në flagrancë shtetasit kosovarë B. Z., 45 vjeç, F. Z., 34 vjeç, A. I., 23 vjeç, A. G., 20 vjeç, A. M., 21 vjeç.

Nga kontrolli i ushtruar në 14 valixhe (bagazhet e të arrestuarve), janë konstatuar 1 057 840 tableta (barna) të dyshuara të kontrabanduara, me peshë 417.1 kg, që dyshohet se përdoren si preparate për përgatitjen e lëndëve narkotike.

Gjatë kontrollit fizik ndaj shtetasit B. Z., shërbimet e Policisë i gjetën 300,000 euro, të cilat ai nuk i kishte deklaruar në kufi.

Medikamentet mjekësore, shuma 300,000 euro dhe 6 celularë u sekuestruan në cilësinë e provës materiale. Materialet i kaluan Prokurorisë. /Telegrafi/